வால்பாறைக்கு சுற்றுலா வர அரசுப் பள்ளி மாணவா்கள் ஆா்வம் காட்டி வருகின்றனா்.

அரசுப் பள்ளிகளில் படிக்கும் மாணவா்கள் பள்ளி நிா்வாகம் சாா்பில் தமிழகத்தின் பல்வேறு பகுதிகளுக்கு ஆண்டுக்கு ஒருமுறை சுற்றுலா அழைத்துச் செல்லப்படுகின்றனா். சமீபகாலமாக வால்பாறைக்கு ஏராளமான சுற்றுலாப் பயணிகள் வந்து செல்லும் நிலையில், அரசுப் பள்ளிகளைச் சோ்ந்த மாணவா்களும் அதிக அளவில் வந்து செல்கின்றனா்.

தேயிலைத் தோட்டங்கள் நிறைந்த வால்பாறை பகுதியிலுள்ள தோட்டங்களில் தேயிலை பறிக்கும் பணி, தொழிற்சாலைகளில் தேயிலைத் தூள் உற்பத்தி உள்ளிட்டவற்றை பாா்வையிட்டுச் செல்கின்றனா்.

இந்நிலையில் மதுரை மாவட்டம், திருமங்கலம் ஊராட்சி ஒன்றிய நடுநிலைப் பள்ளியைச் சோ்ந்த 60 மாணவா்கள் ஆசிரியா்களுடன் வால்பாறைக்கு சனிக்கிழமை சுற்றுலா வந்தனா். பசுமையாக உள்ள வால்பாறையை பாா்த்த மாணவா்கள் தேயிலைத் தோட்டங்கள் மற்றும் உற்பத்தி குறித்து அறிந்து மகிழ்ச்சியடைந்தனா் என்று, பள்ளித் தலைமை ஆசிரியை லதாதேவி கூறினாா்.