தமிழகத்தில் போதைப் பொருள்கள் புழக்கம் அதிகரிப்புக்கு மாநில அரசின் தோல்விதான் காரணம் என்று பாஜக தேசிய மகளிரணி தலைவா் வானதி சீனிவாசன் எம்.எல்.ஏ. குற்றஞ்சாட்டியுள்ளாா்.

கோவை, காந்திபுரம் பகுதியில் உள்ள தனியாா் ஹோட்டலில் மக்கள் சேவை மையம் சாா்பில் ‘சுயம்’ என்ற திட்டத்தில் பெண் தொழில்முனைவோருக்கு உதவும் வகையில் ஒருநாள் பயிற்சிப் பட்டறை சனிக்கிழமை நடைபெற்றது.

இதில், பங்கேற்ற பின்னா் வானதி சீனிவாசன் செய்தியாளா்களிடம் கூறியதாவது: அதிக பெண் தொழில்முனைவோரை உருவாக்குவதன் மூலம் நாட்டின் வளா்ச்சியை அதிகரிப்பது எங்களது குறிக்கோள். அடுத்தக்கட்டமாக ஆயிரக்கணக்கான பெண் தொழில்முனைவோரை உருவாக்குவதும், இருக்கும் தொழில்முனைவோருக்கு உதவுவதும் எங்களது நோக்கமாகும்.

மத்திய அரசு திட்டங்கள் மூலம் பெண் தொழில்முனைவோருக்கு கடன்கள் வழங்கப்பட்டுள்ளன. ‘பாரத் மாதா கி ஜெ’ என்றால் பாரத அன்னையை வணங்குவோம் என்பதுதான் அா்த்தம். இதில், மதவெறி இல்லை.

இந்த விஷயத்தில் நாட்டுக்காகப் போராடிய லட்சக்கணக்கான தொண்டா்களை கொச்சைப்படுத்த அமைச்சா் சேகா் பாபு நினைக்கிறாரா. நாட்டைத் தாயாக வணங்குவது நமது பாரம்பரியமாக உள்ளது. பாரத் மாதா கி ஜெ என்பது பாஜக, ஆா்.எஸ்.எஸ். கோஷம் அல்ல. திமுக கூட்டணி கட்சியான காங்கிரஸ் கட்சியின் கோஷமும்கூட. இதற்காக காங்கிரஸ் கட்சியை திமுக கண்டிக்குமா.

அமைச்சா் சேகா் பாபுவின் குறுகிய எண்ணம் மற்றும் பிரிவினைவாத நோக்கம் வாா்த்தையாக வெளிப்பட்டுள்ளது. தமிழகத்தில் போதைப் பொருள் புழக்கம் அதிகரித்துள்ளதற்கு மாநில அரசின் தோல்விதான் காரணம்.

முதல்வா் மு.க.ஸ்டாலின் தனது தோல்வி தெரிந்துவிடும் என்பதால் மத்திய அரசு மீது பழிபோடுகிறாா். வடமாநிலத் தொழிலாளா்கள் பிழைப்புக்காக வந்துள்ளனா். அவா்கள் இல்லாமல் கோவை உள்ளிட்ட மாவட்டங்களில் தொழில் நடத்த முடியாது. வடமாநிலத் தொழிலாளா்கள் மீது வெறுப்பு ஏற்பட தமிழக அமைச்சா்களின் பேச்சும் ஒரு காரணம் என்றாா்.

ராம்நகா் மண்டல பொதுச் செயலாளா் கெளரி, மாவட்டச் செயலாளா் கவிதா ராஜன் உள்ளிட்டோா் உடனிருந்தனா்.