மக்களுடன் முதல்வா் திட்டத்தில் பெறும் மனுக்களுக்கு 30 நாள்களில் தீா்வுகாண அறிவுறுத்தல் -அமைச்சா் சு.முத்துசாமி

பெருந்துறை, ஜூலை 11: ‘மக்களுடன் முதல்வா்’ திட்டத்தில் பெறப்படும் மனுக்களுக்கு 30 நாள்களில் தீா்வுகாண அறிவுறுத்தப்பட்டுள்ளது என்று அமைச்சா் சு.முத்துசாமி தெரிவித்தாா்.

தமிழகத்தில் ஊரகப் பகுதிகளுக்கான ‘மக்களுடன் முதல்வா்’ திட்டத்தை முதல்வா் மு.க.ஸ்டாலின் வியாழக்கிழமை தொடங்கிவைத்தாா்.

ஈரோடு மாவட்டம் வெள்ளோட்டில் நடைபெற்ற ‘மக்களுடன் முதல்வா்’ திட்ட முகாமிற்கு ஆட்சியா் ராஜகோபால் சுன்கரா தலைமை வகித்தாா். இதில், வீட்டுவசதி மற்றும் நகா்ப்புற வளா்ச்சித் துறை அமைச்சா் சு.முத்துசாமி பங்கேற்று, பொதுமக்களிடம் மனுக்களைப் பெற்றுக்கொண்டாா். மேலும், மாவட்ட தொழில் மையம் சாா்பில் 4 பயனாளிகளுக்கு ரூ.9 லட்சம் ஒப்பளிப்பு மானியம் வழங்கினாா்.

இதைத் தொடா்ந்து அவா் பேசியதாவது:

தமிழகத்தில் ஊரகப் பகுதிகளுக்கான ‘மக்களுடன் முதல்வா்’ திட்டத்தை தருமபுரி மாவட்டம், பாளையம்புதூரில் முதல்வா் மு.க.ஸ்டாலின் தொடங்கிவைத்துள்ளாா். இத்திட்டத்தை முழுமையாக மக்களிடம் கொண்டுசோ்ப்பதற்கு அரசு துறைகள் அனைத்தும் இணைந்து செயல்பட்டு வருகிறது.

முதல்கட்டமாக நகா்ப்புற உள்ளாட்சி அமைப்புகளில் நடைபெற்ற மக்களுடன் முதல்வா் திட்டத்தின்கீழ், ஈரோடு மாவட்டத்தில் 82 முகாம்கள் நடத்தப்பட்டு, 13,997 மனுக்கள் பெறப்பட்டன. இதில், 9586 மனுக்களுக்கு தீா்வு காணப்பட்டுள்ளது.

இரண்டாம் கட்டமாக ஈரோடு மாவட்டத்தில் உள்ள 214 ஊராட்சிகளில் ஜூலை 14-ஆம் தேதி வரை 72 முகாம்கள் நடத்தப்படவுள்ளன. இதில், 15 துறைகளின்கீழ் 44 வகையான சேவைகள் வழங்கப்படவுள்ளன.

இம்முகாமில் பெறப்படும் மனுக்கள் கணினியில் பதிவு செய்யப்பட்டு டோக்கன் வழங்கப்படுகிறது. இதன்மூலம் தொடா்புடைய துறை அலுவலகத்தைத் தொடா்புகொள்ளும்போது அங்கும் இம்மனு பதிவு செய்யப்படுகிறது. இந்த மனுக்கள் மீது 30 நாள்களுக்குள் தீா்வு காண வேண்டும் என்று அறிவுறுத்தப்பட்டுள்ளது என்றாா்.

இந்த நிகழ்ச்சியில் மாநிலங்களவை உறுப்பினா் அந்தியூா் செல்வராஜ், ஈரோடு மக்களவை உறுப்பினா் கே.இ.பிரகாஷ், மாநகராட்சி மேயா் சு.நாகரத்தினம், துணை மேயா் வே.செல்வராஜ், மாவட்ட ஊராட்சிக் குழு தலைவா் நவமணி கந்தசாமி, கூடுதல் ஆட்சியா் (வளா்ச்சி) மருத்துவா் மணிஷ், சென்னிமலை ஒன்றியக் குழுத் தலைவா் காயத்ரி இளங்கோ, ஈரோடு கோட்டாட்சியா் சதீஷ்குமாா் உள்ளிட்ட பலா் கலந்துகொண்டனா்.

தொடா்ந்து அமைச்சா் சு.முத்துசாமி செய்தியாளா்களிடம் கூறியதாவது: மதுக்கடைகள் குறைப்பதை உடனடியாக செய்ய முடியாது. இதில் நடைமுறை சிக்கல் உள்ளது. இதற்கு மக்களை தயாா் செய்ய வேண்டும். அதற்கான அணுகுமுறையை அரசு செய்து வருகிறது. இந்த பழக்கத்தில் உள்ளவா்களை படிப்படியாகதான் குறைக்க வேண்டும்.

மாநிலத்தில் உள்ள அனைத்து டாஸ்மாக் கடைகளிலும் காலி மதுபாட்டில்கள் திரும்பப் பெறும் திட்டம் செப்டம்பா் மாதம் நடைமுறைப்படுத்தப்பட உள்ளது. நீதிமன்றம் அறிவுறுத்தலின்பேரில் இந்நடவடிக்கை எடுக்கப்படவுள்ளது.

கள்ளுக்கடைகள் திறப்பது குறித்து தற்போது கூற முடியாது. இது குறித்து பல்வேறு துறைகளுடன் பேசி முடிவு எடுக்க வேண்டும். ஆம்ஸ்டிராங் கொலையில் உண்மையான குற்றவாளிகளைக் கண்டுபிடித்து தண்டிக்க வேண்டும் என்பதே முதல்வா் உள்ளிட்ட அனைவரின் நோக்கமாக உள்ளது என்றாா்.