ஈரோடு: மகளிா் உரிமைத் தொகை தகுதியானா்களுக்கு கிடைக்க நடவடிக்கை எடுக்க வேண்டும் என பொதுமக்களுடன் வந்து முன்னாள் அமைச்சா் தோப்பு வெங்கடாசலம் ஆட்சியரிடம் முறையிட்டாா்.
பொதுமக்கள் குறைதீா் கூட்டம் ஆட்சியா் ச.கந்தசாமி தலைமையில் மாவட்ட ஆட்சியா் அலுவலகத்தில் திங்கள்கிழமை நடைபெற்றது.
இதில், ஈரோடு மத்திய மாவட்ட திமுக செயலாளரும், முன்னாள் அமைச்சருமான தோப்பு வெங்கடாசலம் மற்றும் பொதுமக்கள் அளித்த மனு விவரம்: மகளிா் உரிமைத் தொகை திட்டத்தில் விண்ணப்பித்த தகுதியான 1,000-க்கும் மேற்பட்டவா்கள் மனு நிராகரிக்கப்பட்டுள்ளது. அதற்கு உரிய காரணத்தை மக்களிடம் அதிகாரிகள் விளக்க வேண்டும். குடிசை வீட்டில் வசிப்போா், வீடே இல்லாமல் சாலையோரம் வசிப்போா் விடுபட்டுள்ளனா்.
10 ஏக்கா் நிலம் வைத்திருப்போருக்கு மகளிா் உரிமைத் தொகை கிடைத்துள்ளது. எந்த அடிப்படையில் அதிகாரிகள், பட்டியல் சோ்க்கிறாா்கள் என விளக்க வேண்டும் எனத் தெரிவிக்கப்பட்டுள்ளது.
மனுவைப் பெற்றுக்கொண்ட ஆட்சியா், அதிகாரிகள் தகுதி அடிப்படையிலும், மக்கள் வழங்கும் ஆவணம், நேரடி விசாரணை மூலமே தோ்வு செய்கின்றனா். ஆங்காங்கே சில விடுபட்டிருந்தால் அதைக் கவனத்துக்கு கொண்டு வந்தால் பரிசீலிக்கப்படும். ஒவ்வொருவருக்கும் காரணத்தை கூற இயலாது. திங்கள்கிழமை மக்கள் குறைதீா் கூட்டம் நடப்பதால் மற்றவா்கள் மனு அளிக்க சிரமமாக இருக்கும். உங்கள் மனு குறித்து விசாரணை நடத்தப்படும் எனக் கூறினாா்.
இதைத் தொடா்ந்து, தோப்பு வெங்கடாசலம் செய்தியாளா்களிடம் கூறுகையில், அதிகாரிகள் நேரில் விசாரிக்க வேண்டும். தகுதியானவா்களுக்கு மகளிா் உரிமைத் தொகை வழங்கினால்தான் அரசுக்கு நல்ல பெயா் கிடைக்கும். தகுதியானவா்களை நாங்களே பட்டியலிட்டு கொடுத்தும் பலரை அதிகாரிகள் விட்டுள்ளனா் என்றாா்.
ஆட்டோ நிறுத்த வாய்ப்பு வழங்கக் கோரிக்கை: இதுகுறித்து இந்து ஆட்டோ தொழிலாளா் முன்னணி சங்கம் சாா்பில் அளித்த மனு விவரம்: ஈரோடு, சோலாா் புதிய பேருந்து நிலையத்தில் புதிதாக அமைக்கப்பட்டுள்ள ஆட்டோ நிறுத்தத்தில் ஆட்டோ நிறுத்த விண்ணப்பித்தோம். குலுக்கல் முறையில் யாருக்கு கிடைக்கிறதோ, அவா்களே நிறுத்த முடியும் மாநகராட்சி நிா்வாகம் தெரிவித்தது.
குலுக்கலில் வெளி மாவட்டங்களைச் சோ்ந்தவா்கள், பழைய பேருந்து நிலையம் மற்றும் ரயில்வே நிலைய ஆட்டோ நிறுத்தங்களில் பல ஆண்டுகளாக ஓட்டி வருபவா்கள், பல ஆட்டோக்களை வைத்துள்ள உரிமையாளா்களுக்குத்தான் குலுக்கலில் வாய்ப்பு கிடைத்துள்ளது.
எங்களைப்போல தொழிலாளா்கள், சவாரி இல்லாத பகுதிகளில் இயக்குவோருக்கு வாய்ப்பு தரவில்லை. எனவே, மறுபரிசீலனை செய்து ஆட்டோ தொழிலாளா்களுக்கு வாய்ப்பு தர வேண்டும் எனத் தெரிவிக்கப்பட்டுள்ளது.
உதவித்தொகை வழங்கக் கோரிக்கை: கோபி வட்டம், மொடச்சூா், ராஜீவ் நகரைச் சோ்ந்த ரவி என்பவா் அளித்த மனு விவரம்: நானும், எனது மனைவியும் கூலி வேலை செய்து பிழைப்பு நடத்துகிறோம். நான் பெயிண்டிங் வேலைக்குச் சென்று வந்தேன். சில மாதங்களுக்கு முன் எனது காலில் எலும்புகள் அதிகமாக வளா்ந்து, கடும் வலி, வீக்கத்தால் சிரமப்பட்டேன். கோபி அரசு மருத்துவமனையில் அறுவை சிகிச்சை செய்து, கூடுதல் எலும்புகளை அகற்றினா். எனது காலில் ஒரு அடி உயரத்துக்கு கம்பி, போல்ட் போன்றவைகளை வைத்து துளை போட்டு கட்டியுள்ளனா். வேலைக்குச் செல்லவும், நடக்கவும் கூடாது என மருத்துவா்கள் அறிவுறுத்தியுள்ளனா். என்னை ஒரு ஆள் உடன் இருந்து கவனிக்க வேண்டி உள்ளதால் எனது மனைவியாலும் வேலைக்குச் செல்ல முடியவில்லை. எனவே, மருத்துவ செலவுக்கு உதவும் வகையில் எனக்கு மாதந்தோறும் உதவித் தொகை வழங்க வேண்டும் எனத் தெரிவிக்கப்பட்டுள்ளது.
குடிநீா்ப் பிரச்னைக்கு தீா்வு காண வேண்டும்: ஈரோடு, சித்தோடு அருகேயுள்ள செங்கம்பாளையம், ஆவுடையான்காடு, கருப்பண்ணசாமி நகா் பகுதியில் 30-க்கும் மேற்பட்ட குடும்பத்தில் 150 போ் வசிக்கிறோம். இந்த இடத்துக்கு ஒரே ஒரு குடிநீா் இணைப்பு மட்டுமே உள்ளதால், ஒரு குடும்பத்துக்கு 3, 4 குடம்கூட தண்ணீா் கிடைப்பதில்லை. வெகு தொலைவு சென்று குடிக்கவும், பிற பயன்பாட்டுக்கும் தண்ணீா் எடுத்துவரும் நிலை உள்ளது.
எனவே, எங்கள் பகுதியில் கூடுதல் குடிநீா் இணைப்புகளை ஏற்படுத்த வேண்டும். மேலும், சாலை, தெருவிளக்கு உள்ளிட்ட அடிப்படை வசதிகளையும் செய்து கொடுக்க வேண்டும் எனத் தெரிவிக்கப்பட்டுள்ளது.
சென்னிமலை, பெருந்துறை ஆா்.எஸ். சாலை, அம்மா மெட்ரோ நகா் பகுதியினா் அளித்த மனு விவரம்: அம்மா மெட்ரோ நகரில் கைத்தறி நெசவாளா்களுக்காக தமிழக அரசு 66 பசுமை வீடு கட்டித்தந்தது. இப்பகுதிக்கு குடிநீா் வசதி இல்லை. இங்குள்ள ஒரு ஆழ்துளைக் கிணறை நம்பி இருந்தோம். தற்போது அந்த ஆழ்துளைக் கிணறும் தண்ணீா் இன்றி வடுள்ளது. பிரதான சாலையில் காவிரி குடிநீா் செல்வதால் அங்கிருந்து குழாய் மூலம் எங்கள் பகுதிக்கு தண்ணீா் இணைப்பு வழங்க வேண்டும்.
இதே கோரிக்கையை வலியுறுத்தி கம்புளியம்பட்டி, காசிலிங்ககவுண்டன்புதூா் மக்கள் மனு அளித்தனா்.
மயான ஆக்கிரமிப்பை அகற்ற வேண்டும்: பெருந்துறை வட்டம், சீனாபுரம் அருகேயுள்ள நிமிட்டிபாளையம் காலனி மக்கள் அளித்த மனு விவரம்: நிமிட்டிபாளையம் காலனியில் 40-க்கும் மேற்பட்ட குடும்பத்தினா் வசிக்கிறோம். எங்கள் பகுதியில் உள்ள மயானத்துக்குச் செல்ல பொது வழி இருந்தது.
இதை சிலா் ஆக்கிரமித்துள்ளனா். இதனால், வெகு தொலைவு சுற்றி செல்ல வேண்டிய நிலை ஏற்பட்டுள்ளது.எனவே, ஆக்கிரமிப்பை அகற்றி வழித்தடத்தை ஏற்படுத்த வேண்டும் எனத் தெரிவிக்கப்பட்டுள்ளது.
தேவாலயம் கட்ட எதிா்ப்பு: ஈரோடு மாநகராட்சி வாா்டு எண் 9, குபோ் நகா், ஸ்ரீகிருஷ்ணா நகா், ஆறுபடையான் நகா், அடுக்குப்பாறை பகுதி சின்னமாரியம்மன் கோயில் நலச் சங்கம் ஆகியவை சாா்பில் அளித்த மனு விவரம்: இப்பகுதியில், 500-க்கும் மேற்பட்ட குடும்பங்களைச் சோ்ந்த மக்கள் வசிக்கிறோம். இங்குள்ள சின்ன மாரியம்மன் கோயிலில் வழிபாடு செய்து வருகிறோம். தற்போது அதன் அருகே தேவாலயம் கட்டுவதற்கான பணிகள் நடந்து வருகின்றன. அக்கட்டுமானம், சாலையை மறித்தும், அவ்வழியாக யாரும் வர இயலாத வகையிலும் அமைக்கின்றனா்.
எனவே, அந்த இடத்தில் தேவாலயம் கட்ட அனுமதிக்கக்கூடாது எனத் தெரிவிக்கப்பட்டுள்ளது.
258 மனுக்கள்: குறைதீா் கூட்டத்தில் பல்வேறு கோரிக்கைகள் தொடா்பாக பொதுமக்களிடமிருந்து மொத்தம் 258 மனுக்கள் மனுக்கள் பெறப்பட்டன. இந்த மனுக்களை சம்பந்தப்பட்ட துறை அலுவலா்களிடம் வழங்கிய ஆட்சியா் உரிய நடவடிக்கை எடுக்க உத்தரவிட்டாா்.
இதையடுத்து, மாவட்ட அளவிலான கலைத் திருவிழா போட்டிகளில் வெற்றிபெற்ற 30 மாணவா்களுக்கு ஆட்சியா் பாராட்டுச் சான்றிதழ் வழங்கினாா்.
கூட்டத்தில், மாவட்ட வருவாய் அலுவலா் எஸ்.சாந்தகுமாா் மற்றும் பல்வேறு துறை அதிகாரிகள் பங்கேற்றனா்.