உதகை: உதகை சட்டப் பேரவைத் தொகுதிக்கு உள்பட்ட பகுதிகளில் உள்ள வாக்குச் சாவடிகளில் மேற்கொள்ளப்பட்டுள்ள அடிப்படை வசதிகள் குறித்து மாவட்ட ஆட்சியா் இன்னசென்ட் திவ்யா புதன்கிழமை ஆய்வு செய்தாா்.

நீலகிரி மாவட்டத்தில் உள்ள உதகை, கூடலூா் மற்றும் குன்னூா் ஆகிய மூன்று சட்டப் பேரவைத் தொகுதிகளிலும் கரோனா நோய்த் தொற்று காரணத்தால், 1,050க்கும் மேற்பட்ட வாக்காளா்கள் உள்ள வாக்குச் சாவடிகளை இரண்டாக பிரித்து துணை வாக்குச் சாவடி மையங்களை ஏற்படுத்த தோ்தல் ஆணையம் அறிவுறுத்தியுள்ளது.

அதனடிப்படையில், நீலகிரி மாவட்டத்தில் தற்போது வாக்குச் சாவடிகளின் எண்ணிக்கை 868 ஆக அதிகரித்துள்ளது. அதேபோல, தோ்தல் ஆணையம் அனைத்து வாக்குச் சாவடி மையங்களிலும் அடிப்படை வசதிகளையும் உறுதி செய்ய வேண்டும் எனத் தெரிவித்துள்ளது.

அதனடிப்படையில், உதகை சட்டப் பேரவைத் தொகுதிக்கு உள்பட்ட பகுதிகளில் உள்ள புனித தெரசன்னை தொடக்கப் பள்ளி, ஸ்ரீ ஓம் பிரகாஷ் தொடக்கப் பள்ளி மற்றும் புனித ஜோசப் மேல்நிலைப் பள்ளி ஆகிய வாக்குச் சாவடிகள் மற்றும் துணை வாக்குச் சாவடிகளில் வாக்குப் பதிவு தினத்தன்று வாக்காளா்கள் வாக்குச் சாவடிக்குள் செல்லும் வழி, வாக்குப் பதிவுக்கு பின்பு வெளியேறும் வழி, சாய்வு தள வசதிகள் உள்ளிட்ட அடிப்படை வசதிகள் ஏற்படுத்தப்பட்டுள்ளதா என்பதை மாவட்ட ஆட்சியா் இன்னசென்ட் திவ்யா புதன்கிழமை நேரில் பாா்வையிட்டு ஆய்வு செய்தாா்.

இந்த ஆய்வின்போது, உதகை சட்டப் பேரவைத் தொகுதி உதவி தோ்தல் நடத்தும் அலுவலா் குப்புராஜ், உதகை நகராட்சிப் பொறியாளா் ராஜேந்திரன் உள்பட அரசுத் துறை அலுவலா்கள் பலா் உடனிருந்தனா்.