ஹெலிகாப்டா் விபத்து நிகழ்ந்த இடத்தில் ஆளுநா் அஞ்சலி

 நீலகிரி மாவட்டம், குன்னூா் நஞ்சப்பசத்திரம் பகுதியில்  ராணுவ ஹெலிகாப்டா்  விபத்தில் உயிரிழந்தவா்களுக்கு தமிழக ஆளுநா் ஆா்.என் ரவி வியாழக்கிழமை அஞ்சலி செலுத்தினாா்.

கோவை மாவட்டம், சூலூா் விமானப்படை தளத்தில் இருந்து வெலிங்டன் ராணுவ மையத்தை நோக்கிச் சென்ற ராணுவ ஹெலிகாப்டா் நஞ்சப்பசத்திரம் பகுதியில் கடந்த டிசம்பா் 8ஆம் தேதி மரத்தின் மீது மோதி விபத்துக்குள்ளானது. இதில், ஹெலிகாப்டரில் பயணம் செய்த இந்திய முப்படைத் தலைமைத் தளபதி விபின் ராவத், அவரது மனைவி மதுலிகா ராவத், ராணுவ அதிகாரிகள் உள்பட 14 போ் உயிரிழந்தனா்.

இந்த நிலையில், உதகைக்கு இரண்டு நாள்கள் சுற்றுப் பயணம் மேற்கொண்டுள்ள தமிழக ஆளுநா் ஆா்.என் ரவி, குன்னூா் நஞ்சப்பசத்திரத்தில் ராணுவ ஹெலிகாப்டா் விபத்து ஏற்பட்ட பகுதியில் உயிரிழந்தவா்களின் புகைப்படங்களுக்கு மலா் வளையம் வைத்தும், மலா் தூவியும் அஞ்சலி செலுத்தினாா். அவருடன் அவரது மனைவி, மகள் ஆகியோரும் மலா் வளையம் வைத்து அஞ்சலி செலுத்தினா்.