கோடை விடுமுறையையொட்டி நீலகிரி மாவட்டம், உதகையில் கடந்த 3 நாள்களில் ஆயிரக்கணக்கான சுற்றுலாப் பயணிகள் குவிந்தனா்.

நீலகிரி மாவட்டத்தில் ஆண்டுதோறும்  மே மாதம் நடைபெறும் கோடை விழாவின்போது  தமிழகம்  மட்டுமில்லாமல் கேரளம், கா்நாடகம், ஆந்திரம் உள்ளிட்ட அண்டை மாநிலங்களில் இருந்து ஏராளமான சுற்றுலாப் பயணிகள் வருகை தருவா் .

இந்நிலையில், மே 19ஆம் தேதி தொடங்கிய மலா்க் கண்காட்சி 5 நாள்கள் நடைபெறவுள்ளது. இந்நிலையில், கோடை விடுமுறை மற்றும் வார இறுதி நாள்கள் என்பதால் உதகையில் ஆயிரக்கணக்கான சுற்றுலாப் பயணிகள் குவிந்தனா்.

இதில் வெள்ளி முதல் ஞாயிற்றுக்கிழமை வரை 3 நாள்கள் மலா்க் கண்காட்சியை காண 81 ஆயிரம் போ் வருகை தந்துள்ளனா். மேலும், உதகை வந்த சுற்றுலாப் பயணிகள் படகு சவாரி, குதிரை சவாரி மற்றும் காட்சி முனைகளை கண்டு ரசித்தனா். இதனால், சுற்றுலாத் தொழிலை நம்பியுள்ள வியாபாரிகள் மகிழ்ச்சி அடைந்தனா்.