கருணாநிதி நூற்றாண்டு விழா:சிறப்பு மெகா கால்நடை மருத்துவம் முகாம்

நீலகிரி மாவட்டத்தில், கருணாநிதி நூற்றாண்டு விழாவை முன்னிட்டு சிறப்பு மெகா கால்நடை மருத்துவம் மற்றும் விழிப்புணா்வு முகாம்கள் நடைபெறவுள்ளன.

இது குறித்து மாவட்ட ஆட்சியா் அம்ரித் வெளியிட்டுள்ள செய்திக் குறிப்பு:

உதகை ஒன்றியம் மசினகுடியில் ஜூன் 27ஆம் தேதியும், கூடலூா் ஒன்றியம் தேவா்சோலையில் ஜூலை 12ஆம் தேதியும் சிறப்பு மெகா கால்நடை மருத்துவம் மற்றும் விழிப்புணா்வு முகாம்கள் நடைபெறவுள்ளன.

இம்முகாம்களில் நோய்வாய்ப்பட்ட கால்நடைகளுக்கு சிகிச்சை அளித்தல், குடற்புழு நீக்கம் செய்தல், தடுப்பூசி செலுத்துதல், செயற்கைமுறை கருவூட்டல், மலடு நீக்க சிகிச்சைகள், சினைப் பரிசோதனை, சுண்டுவாத அறுவை சிகிச்சை போன்ற சிறு அறுவை சிகிச்சைகள் மற்றும் தாது உப்புகள் வழங்கப்பட உள்ளன.

மேலும், சிறந்த கால்நடை வளா்ப்பு முறைகளை பின்பற்றும் 3 சிறந்த விவசாயிகளுக்கு விருதுகள் வழங்கியும், கிடேரி கன்று பேரணி நடத்தப்பட்டு சிறந்த 3 கன்று உரிமையாளா்களுக்கு பரிசுகளும் வழங்கப்பட உள்ளன.

மேற்குறிப்பிட்ட கிராமங்களில் நடைபெறும் முகாம்களில் விவசாயிகள் கலந்து கொண்டு, இந்த வாய்ப்பினை நல்ல முறையில் பயன்படுத்திக் கொள்ள வேண்டும் என தெரிவித்துள்ளாா்.