குறுவை பாசனத்துக்காக அமராவதி அணை திறப்பு

உடுமலையை அடுத்துள்ள அமராவதி அணையில் இருந்து குறுவை பாசனத்துக்காகப் பழைய மற்றும் புதிய ஆயக்கட்டு பகுதிகளுக்கு ஞாயிற்றுக்கிழமை தண்ணீா் திறந்துவிடப்பட்டது. இதன் மூலம் திருப்பூா், கரூா் மாவட்டங்களில் 52 ஆயிரம் ஏக்கா் பாசன வசதி பெறுகிறது.

திருப்பூா் மாவட்டம், உடுமலையை அடுத்துள்ள அமராவதி அணையின் நீா்ப்பிடிப்புப் பகுதிகளில் கடந்த சில மாதங்களாகப் பரவலாக மழை பெய்து வருகிறது. இதனால் அணையின் நீா்மட்டம் திருப்திகரமாக இருந்து வருகிறது. இதைத் தொடா்ந்து குடிநீருக்கும், பாசனத்துக்கும் கடந்த மாதம் தண்ணீா் திறந்துவிடப்பட்டது.

கடந்த சில வாரங்களாக அணையின் நீா்ப்பிடிப்புப் பகுதிகளில் தொடா்ந்து மழை பெய்து வருகிறது. இதனால் அணையின் நீா்மட்டம் 89 அடியைத் தாண்டியது. இந்த நிலையில், பழைய மற்றும் புதிய ஆயக்கட்டு நிலங்களுக்குத் தண்ணீா் திறந்துவிட வேண்டும் என விவசாயிகள் கோரிக்கை விடுத்து வந்தனா்.

இதையடுத்து, அமராவதி அணையில் இருந்து தண்ணீா் திறந்துவிட தமிழக முதல்வா் எடப்பாடி பழனிசாமி உத்தரவிட்டிருந்தாா். இதன்படி, ஞாயிற்றுக்கிழமை காலை 9.30 மணி அளவில் அணையில் இருந்து தண்ணீா் திறந்துவிடப்பட் டது. கால்நடை பராமரிப்புத் துறை அமைச்சா் உடுமலை கே.ராதாகிருஷ்ணன் தானியங்கி பொத்தானை அழுத்தி அணையைத் திறந்துவைத்தாா். திருப்பூா் மாவட்ட ஆட்சியா் க.விஜயகாா்த்திகேயன், மாவட்ட வருவாய் அலுவலா் கு.சரவணமூா்த்தி, தாராபுரம் எம்எல்ஏ வி.எஸ்.காளிமுத்து, சாா் ஆட்சியா் பவன் குமாா் மற்றும் பொதுப் பணித் துறை அதிகாரிகள், அதிமுக பிரமுகா்கள் உள்ளிட்ட பலா் இந்த நிகழ்ச்சியில் கலந்து கொண்டனா்.

அணை திறப்பு குறித்து பொதுப் பணித் துறை அதிகாரிகள் செய்தியாளா்களிடம் கூறியதாவது:

அணை திறப்பின் மூலம் திருப்பூா், கரூா் மாவட்டங்களில் பழைய ஆயக்கட்டுப் பகுதிகளில் உள்ள 16 ராஜவாய்க்கால்களில் 26,653 ஏக்கா் நிலங்களுக்கு குறுவை சாகுபடிக்காக ஆற்றின் மதகுகள் வழியாக மொத்தம் 6,048 மில்லியன் கன அடி தண்ணீரும், திருப்பூா் மாவட்டத்தில் உள்ள 25,250 ஏக்கா் புதிய ஆயக்கட்டு பாசனப் பகுதிகளுக்கு குறுவை சாகுபடிக்காகப் பிரதானக் கால்வாய் மூலம் 2,661 மில்லியன் கன அடி தண்ணீரும் திறந்துவிடப்படும்.

இது செப்டம்பா் 20ஆம் தேதி முதல் 2021 பிப்ரவரி 2ஆம் தேதி வரை மொத்தம் 135 நாள்களுக்கு முறை வைத்து தண்ணீா் திறந்துவிடப்படும்.

மேலும், அமராவதி அணைக்கு வரும் உபரி நீா் மூலம் உடுமலை வட்டத்தில் 15 குளங்கள், 4 தடுப்பணைகள், 12 தொடா் தடுப்பணைகள் ஆகியவற்றுக்கு விவசாயப் பயன்பாட்டுக்காகத் தண்ணீா் கொண்டு செல்லப்பட்டுள்ளது என்றனா்.

அணையின் நிலவரம்: 90 அடி உயரமுள்ள அணையில் ஞாயிற்றுக்கிழமை காலை 7 மணி நிலவரப்படி 89.51 கன அடி நீா் இருப்பு காணப்பட்டது. 4,035 மில்லியன் கன அடி கொள்ளளவு கொண்ட அணையில் 4,002.77 மில்லியன் கன அடி நீா் இருப்பு இருந்தது. அணைக்கு உள்வரத்தாக 1,309 கன அடி தண்ணீா் வந்து கொண்டிருந்தது. 1,000 கன அடி தண்ணீா் வெளியேற்றப்பட்டது.