திருப்பூா் மாவட்டம் குண்டடம் அருகே உள்ள தேசியமயமாக்கப்பட்ட வங்கியை வரும் திங்கள்கிழமை முற்றுகையிட்டு போராட்டம் நடத்துவதாக கட்சி சாா்பற்ற தமிழக விவசாயிகள் சங்கம் அறிவித்துள்ளது.

இதுகுறித்து அச்சங்கத்தின் திருப்பூா் மாவட்டத் தலைவா் எம்.ஈஸ்வரன் வெளியிட்டுள்ள அறிக்கையில் கூறியுள்ளதாவது: குண்டடம் அருகே உள்ள சங்கராண்டாம்பாளையத்தில் கனரா வங்கி செயல்பட்டு வருகிறது. இந்த வங்கியில் விவசாயி ஒருவா் நகைக்கடன் பெற்றுள்ளாா்.

இந்த நகைக்கடனுக்காக வட்டியை செலுத்தவோ அல்லது முழுத் தொகையைக் கட்டி நகையை மீட்கவோ விடமால் வங்கி மேலாளா் இடையூறு செய்கிறாா். நகைக் கடன் பெற்ற விவசாயியின் தந்தை வாங்கிய பயிா்க்கடனை செலுத்தாவிட்டால் வரும் ஜனவரி 12 ஆம் தேதி நகை ஏலத்தில் விடப்படும் என்று அறிவித்துள்ளாா்.

ஆகவே,விவசாயியைத் துன்புறுத்தும் வங்கி மேலாளரைக் கண்டித்து கட்சி சாா்பற்ற தமிழக விவசாயிகள் சங்கம், ஏா்முனை இளைஞா் அணி சாா்பில் சாா்பில் திங்கள்கிழமை வங்கி முற்றுகைப் போராட்டம் நடத்தப்படும் என்று தெரிவிக்கப்பட்டுள்ளது.