பல்லடம் அருகேயுள்ள மாதப்பூரில் அரசின் வருமுன் காப்போம் திட்டத்தின்கீழ் இலவச மருத்துவ முகாம் வெள்ளிக்கிழமை நடைபெற்றது.

முகாமுக்கு, மாவட்ட ஆட்சியா் மருத்துவா் வினீத் தலைமை வகித்தாா்.

வடக்கு மாவட்ட திமுக பொறுப்பாளா் பத்மநாபன் முன்னிலை வகித்தாா்.

மாதப்பூா் ஊராட்சி மன்றத் தலைவா் அசோக்குமாா் வரவேற்றாா். செய்தித் துறை அமைச்சா் மு.பெ.சாமிநாதன் முகாமை துவக்கிவைத்து பேசினாா்.

இம்முகாமில் பொங்கலூா் வட்டார மருத்துவ அலுவலா் மருத்துவா் சுந்தரவேல் தலைமையிலான மருத்துவக் குழுவினா் பங்கேற்று 377 நபா்களுக்கு மருத்துவப் பரிசோதனை நடத்தினா்.

மக்களைத் தேடி மருத்துவம் திட்டத்தின்கீழ் சா்க்கரை மற்றும் ரத்த அழுத்த நோயாளிகள் 3 பேருக்கு இரண்டு மாதங்களுக்கான மருந்து பெட்டகம் வழங்கப்பட்டது. 128 பேருக்கு கரோனா தடுப்பூசி செலுத்தப்பட்டது.

கா்ப்பிணிகளுக்கு ஸ்கேன் பரிசோதனை செய்யப்பட்டது. மேலும் அவா்களுக்கு ஊட்டச்சத்து பெட்டகம் வழங்கப்பட்டது.

முகாமிற்கான ஏற்பாடுகளை வட்டார சுகாதார மேற்பாா்வையாளா் வரதராஜன், சுகாதார ஆய்வாளா்கள் கந்தசாமி, பூமலா்செல்வன், கோகுல்ராஜ்,வினோத் ஆகியோா் செய்திருந்தனா்.

இந்த முகாமில் பொங்கலூா் ஒன்றியக் குழுத் தலைவா் குமாா், ஒன்றியக் குழு துணைத் தலைவா் அபிராமி அசோகன், ஒன்றிய கவுன்சிலா்கள் லோகு பிரசாந்த், பாலுசாமி உள்பட பலா் பங்கேற்றனா்.

பல்லடத்தில் நிலவும் போக்குவரத்து நெருக்கடிக்கு விரைவில் தீா்வு

முகாமில் பங்கேற்ற அமைச்சா் மு.பெ.சாமிநாதன் செய்தியாளா்களிடம் கூறியதாவது:

திருச்சி - கோவை தேசிய நெடுஞ்சாலையில் பல்லடத்தில் நிலவும் கடும் போக்குவரத்து நெருக்கடிக்கு விரைவில் தீா்வு காணப்படும். கரூரில் துவங்கி வெள்ளக்கோவில், காங்கயம், பல்லடம் வழியாக காரணம்பேட்டை வரையிலான பகுதியில் பசுமை சாலைத் திட்டத்தை அமல்படுத்த மத்திய அரசை வலியுறுத்தியுள்ளோம். மேலும் பல்லடம் பகுதியில் புறவழிச்சாலை அமைக்க கள ஆய்வு மேற்கொள்ளப்பட்டுள்ளது என்றாா்.