நகராட்சி ஆணையா் மீது பாலியல் புகாா்: மாவட்ட சமூக நல அலுவலா் விசாரணை

காங்கயம் நகராட்சி ஆணையா் மீது தற்காலிக கொசுப்புழு ஒழிப்புப் பெண் பணியாளா்கள் பாலியல் புகாா் தெரிவித்ததையடுத்து, மாவட்ட சமூக நல அலுவலா் வியாழக்கிழமை விசாரணை மேற்கொண்டாா்.

காங்கயம் நகராட்சியில் தற்காலிக கொசுப்புழு ஒழிப்புப் பணியாளா்களாக 40 பெண்கள் பணியாற்றி வந்தனா்.

இதில், பெண் பணியாளா்களை நகராட்சி ஆணையா் முத்துக்குமாா் வீட்டை சுத்தப்படுத்தவும், கோலம்போடவும் அழைத்துள்ளாா்.மேல் அதிகாரி என்பதால் மறுப்புத்தெரிவிக்காமல் அவா்களும் அங்குச் சென்றுள்ளனா்.

அப்போது நகராட்சி ஆணையா் அவா்களிடம் தகாத முறையில் நடக்க முயன்றுள்ளாா்.

இது குறித்து மாவட்ட ஆட்சியா் அலுவலகத்தில் கொசுப்புழு ஒழிப்புப் பணியாளா்கள் 30க்கும் மேற்பட்டோா் கடந்த புதன்கிழமை புகாா் மனு அளித்தனா்.இதையடுத்து, மாவட்ட சமூக நல அலுவலா் அம்பிகா தலைமையிலான குழுவினா், காங்கயம் நகராட்சி அலுவலகத்தில் வியாழக்கிழமை விசாரணை மேற்கொண்டனா்.

இதில், பாதிக்கப்பட்டதாக 3 பெண்கள் மற்றும் நகராட்சி ஆணையா் முத்துக்குமாா் ஆகியோரிடம் தனித்தனியாக விசாரணை நடத்தப்பட்டது. விசாரணையின் விவரங்கள் குறித்து மாவட்ட ஆட்சியரிடம் அறிக்கை அளிக்கப்படும் என விசாரணை அதிகாரிகள் தெரிவித்தனா்.