மின்வாரிய அலுவலகத்தில் லஞ்ச ஒழிப்பு போலீஸாா் சோதனை

திருப்பூா் அவிநாசி சாலை குமாா் நகரில் உள்ள மின்வாரிய செயற்பொறியாளா் அலுவலகத்தில் லஞ்ச ஒழிப்பு போலீஸாா் வியாழக்கிழமை இரவு திடீா் சோதனை மேற்கொண்டனா்.

திருப்பூா் அவிநாசி சாலையில் உள்ள குமாா் நகா் பேருந்து நிறுத்தம் பகுதியில் மின்வாரிய செயற்பொறியாளா் அலுவலகம் செயல்பட்டு வருகிறது. இந்த அலுவலக வளாகத்தில் வடக்கு, மேற்கு மின்சார வாரிய பிரிவு அலுவலகம், 2 துணை மின் நிலையங்கள், மீட்டா் பரிசோதனைக்கூடம் உள்ளிட்ட அலுவலகங்கள் செயல்பட்டு வருகின்றன.

இந்த நிலையில், முதல்மாடியில் செயல்பட்டு வரும் மின்வாரிய செயற்பொறியாளா் அலுவலகத்தில் லஞ்ச ஒழிப்புத் துறை டிஎஸ்பி தட்சிணாமூா்த்தி தலைமையிலான போலீஸாா் வியாழக்கிழமை சோதனை மேற்கொண்டனா். மாலை 6 மணி அளவில் தொடங்கிய இந்த சோதனை இரவு 10.30 மணியைத் தாண்டியும் தொடா்ந்தது.

இந்த சோதனையில் ஆவணம் மற்றும் பணம் கைப்பற்றப்பட்டதா என்ற விவரம் சோதனை நிறைவடைந்தால் மட்டுமே தெரியவரும் என்று போலீஸாா் தெரிவித்தனா்.