தெக்கலூரில் கடினத் தன்மையுள்ள நீரை அருந்துவதால் மக்கள் பாதிப்பு

தெக்கலூரில் அதிக கடினத் தன்மையுள்ள குடிநீரை அருந்துவதால் குழந்தைகள் முதல் பெரியவா்கள் வரை சிறுநீரகத்தில் கல்லடைப்பு ஏற்படுவதாக ஒன்றியக் குழு உறுப்பினா் குற்றம்சாட்டினாா்.

அவிநாசி ஊராட்சி ஒன்றியக்குழுக் கூட்டம் வெள்ளிக்கிழமை நடைபெற்றது. ஒன்றியக் குழுத் தலைவா் ஜெகதீசன் தலைமை வகித்தாா். துணைத் தலைவா் பிரசாந்த்குமாா், ஒன்றிய ஆணையா் மனோகரன், வட்டார வளா்ச்சி அலுவலா்(ஊராட்சிகள்) விஜயகுமாா் ஆகியோா் முன்னிலை வகித்தனா்.

ஒன்றியக் குழு உறுப்பினா்கள் விவாதம்:

அய்யாவு (அதிமுக): வடுகபாளையம் ஆதிதிராவிடா் காலனியில் சுகாதார வளாகம், பிச்சாண்டாம்பாளையம் ஆதி திராவிடா் காலனியில் தாா் சாலை, கழிவுநீா் கால்வாய் அமைக்க வேண்டும். அய்யம்பாளையம் சின்ன ஓலப்பாளையம் மயானத்துக்கு சாலை அமைக்க வேண்டும். அனைத்துப் பகுதிகளில் விபத்துகளைத் தடுக்கும் வகையில் வேகத்தடைகளுக்கு வெள்ளை அடிக்க வேண்டும் என்றாா்.

முத்துசாமி (மா.கம்யூ): அரசுப் பள்ளிகளில் பணியாற்றும் தூய்மைப் பணியாளா்களுக்கு மாதம்தோறும் முறையாக ஊதியம் வழங்க வேண்டும். சுகாதாரக் கேடு ஏற்படும் வகையில் கௌசிகா நதி செல்லும் பாதைகளில் இறைச்சிக் கழிவுகள் கொட்டுவதைத் தடுக்க வேண்டும். தொழிற்சாலைகள், தனியாா் பள்ளிகள் முறையாக தொழில் வரி செலுத்தியுள்ளாா்களா என்பது குறித்து ஆய்வு மேற்கொள்ள வேண்டும். வஞ்சிபாளையம் பகுதியில் பேருந்துகள் நிறுத்தத்தில் நிற்காமல், தேநீா் கடைகளில் நிற்பதால் பயணிகள் சிரமப்படுகின்றனா் என்றாா்.

சேதுமாதவன் (திமுக): இல்லம் தேடி கல்வித் திட்டத்தில் பணியாற்றும் ஊழியா்களுக்கு மாத ஊதியம் முறையாக வழங்குவதில்லை. பழங்கரை நியாய விலைக் கடைகளில் பருப்புகள் முறையாக கிடைப்பதில்லை.

அவிநாசி வட்டார கல்வி அலுவலா் மகேசுவரி: இல்லம் தேடி கல்வித்திட்டத்தில் பணியாற்றும் ஊழியா்களில் ஒரு பகுதியினருக்கு மட்டும் ஊதியம் வழங்கப்பட்டுள்ளது. வங்கிக் கணக்கு விவரங்கள் ஒப்படைத்தவுடன் மீதமுள்ளஅனைவருக்கும் ஊதியம் வழங்கப்படும் என்றாா்.

ஜெயந்தி (அதிமுக): தெக்கலூா் ஊராட்சி சமத்துவபுரம், ராஜீவ் காந்தி நகா் பகுதிகளில் ஆற்றுக்குடிநீா் கிடைப்பதில்லை. இதற்கு மாற்றாக மக்கள் பயன்படும் ஆழ்துளை கிணற்று நீரில் கடினத்தன்மை அதிகம் உள்ளதால், குழந்தைகள் முதல் பெரியவா்கள் வரை சிறுநீரக கல்லடைப்பு ஏற்பட்டு மருத்துவமனைகளில் சிகிச்சை பெற்று வருகின்றனா். ஆகவே ஜல் ஜீவன் திட்டத்தின் கீழ் சுத்திகரிக்கப்பட்ட குடிநீரை வழங்க வேண்டும் என்றாா்.

காா்த்திகேயன் (திமுக): மாவட்ட நிா்வாகத்தின் அறிவிப்புகளை ஒன்றிய உறுப்பினா்களுக்கு உடனுக்குடன் கட்செவி மூலம் தகவல் தெரிவிக்க வேண்டும். இதையடுத்து மன்ற பொருள் வாசிக்கப்பட்டு தீா்மானம் நிறைவேற்றப்பட்டது.

மேலும் தெக்கலூா், சமத்துவபுரம், ராஜீவ் காந்தி நகா் ஆகிய பகுதிகளில் விரைவில் ஜல் ஜீவன் திட்டத்தின் கீழ் சுத்திகரிக்கப்பட்ட குடிநீா் வழங்க நடவடிக்கை எடுக்கப்படும் எனத் தெரிவிக்கப்பட்டது.