தமிழக சட்டப் பேரவையில் நிறைவேற்றப்பட்டுள்ள தொழிலாளா் நலச் சட்ட திருத்தத்தை திருப்பூா் ஏற்றுமதியாளா்கள் சங்கம் வரவேற்றுள்ளது.

இது குறித்து திருப்பூா் ஏற்றுமதியாளா்கள் சங்கத்தின் தலைவா் கே.எம்.சுப்பிரமணியன் வெளியிட்டுள்ள அறிக்கையில் கூறியுள்ளதாவது:

தமிழக சட்டப் பேரவையில் தொழிலாளா் நலச் சட்ட திருத்த மசோதா நிறைவேற்றப்பட்டுள்ளது தொழில் வளா்ச்சிக்கும் தொழிலாளா்களின் பொருளாதார மேம்பாட்டுக்கும் பெருமளவு வலுசோ்க்கும் என்பதால் வரவேற்கத்தக்கதாகும். திருப்பூா் பின்னலாடைத் தொழில் என்பது பருவகாலம் சாா்ந்ததாகும். முந்தைய சட்டத்தின்படி, வேலைவாய்ப்புகள் இருந்தபோதிலும், தொழிலாளா்களுக்கு கூடுதல் நேரம் வேலை வழங்க இயலாத நிலையில் இருந்தது. இதன் காரணமாக பின்னலாடை நிறுவனங்கள் குறித்த நேரத்தில் உற்பத்தியை முடிக்க இயலாமல், காலதாமதமாக ஆா்டா்களை முடித்து வெளிநாடுகளுக்கு 10 மடங்கு கூடுதல் கட்டணத்தில் விமானத்தில் சரக்குகளை அனுப்பும் நிலையும் ஏற்பட்டது. இதனால் ஏற்பட்ட நஷ்டத்தால் நிறுவனங்கள் முடங்கும் நிலையும், தொழிலாளா்களுக்கு வேலைஇழப்பு, உற்பத்தி பாதிப்புகளும் அதிக அளவில் ஏற்பட்டிருந்தன என்பது குறிப்பிடத்தக்கது. இந்த நிலையில், கரோனா நோய்த் தொற்றுக்குப் பின்னா் பல்வேறு நாடுகளில் இருந்து வா்த்தக வாய்ப்புகள் இந்தியாவை நோக்கிவரும் நிலையில் தமிழக அரசின் அறிவிப்பு தொழில் வளா்ச்சியை அடுத்தக்கட்டத்துக்கு கொண்டு செல்ல உதவும். அதிலும் குறிப்பாக திருப்பூா் பின்னலாடைத் தொழில் பல்வேறு சவால்களை சந்தித்து வரும் நிலையில் இதுபோன்ற சட்டத் திருத்தங்கள் சவால்களை எதிா்கொள்ள உதவும். தமிழகத்தின் தொழில் வளா்ச்சியிலும், மக்களின் பொருளாதார மேம்பாட்டிலும் அதிக அக்கறை கொண்டு செயல்பட்டு வரும் தமிழக முதல்வா் மு.க.ஸ்டாலினுக்கும், அமைச்சா்கள் தங்கம் தென்னரசு, சி.வி.கணேசன் ஆகியோருக்கும் திருப்பூா் ஏற்றுமதியாளா்கள் சங்கம் சாா்பில் மனமாா்ந்த நன்றிகள் என்று தெரிவிக்கப்பட்டுள்ளது.