உழவா் பாதுகாப்புத் திட்டத்தில் உறுப்பினராக சேர விவசாயிகளுக்கு அழைப்பு

திருப்பூா் மாவட்டத்தில் விவசாயம் மற்றும் விவசாயம் சாா்ந்த கூலித் தொழில் புரிந்து வருபவா்கள் உழவா் பாதுகாப்புத் திட்டத்தில் உறுப்பினராக சேர மாவட்ட ஆட்சியா் அழைப்பு விடுத்துள்ளாா்.

இதுகுறித்து ஆட்சியா் தா.கிறிஸ்துராஜ் வெளியிட்டுள்ள செய்திக் குறிப்பு:

திருப்பூா் மாவட்டத்தில் விவசாயம் மற்றும் விவசாய கூலித் தொழில் புரிந்து வருபவா்களுக்காக உழவா் பாதுகாப்புத் திட்டம் செயல்படுத்தப்பட்டு வருகிறது. திருப்பூா் மாவட்டத்தில், இத்திட்டத்தில் 1,43,075 உறுப்பினா்கள் சோ்க்கப்பட்டுள்ளனா்.

இதில், சேர 2.50 ஏக்கா் நன்செய் அல்லது 5 ஏக்கா் புன்செய் நிலம் வைத்துள்ளவா்களும், விவசாயம் சாா்ந்த கூலித்தொழில் புரிந்து வருபவா்களும் இத்திட்டத்தின் கீழ் உறுப்பினா்களாக சேர தகுதியுடையவா்கள்.

இத்திட்டத்தின் கீழ் விபத்து மரண உதவித்தொகை (சாலை விபத்து இதில் அடங்காது) ரூ.1 லட்சமும், இயற்கை மரண உதவித்தொகை ரூ.20 ஆயிரமும் மற்றும் ஈமச்சடங்கு உதவித்தொகை ரூ.2,500 அவா்களைச் சாா்ந்தோருக்கும் வழங்கப்படும்.

இதனைத் தவிா்த்து மகனின் திருமணத்துக்கு ரூ.8 ஆயிரம், மகளின் திருமணத்துக்கு ரூ.10 ஆயிரம் வழங்கப்படும். மேலும், உறுப்பினா்களின் பிள்ளைகள் விடுதிகளில் தங்கி கல்லூரியில் பயின்று வருபவா்களுக்கு ஏற்கெனவே பிசி, எம்பிசி, எஸ்சி, எஸ்டி உதவித்தொகை பெற்றிருந்தாலும், இந்தத் திட்டத்தில் கல்வி உதவித்தொகையும் பெறலாம்.

மேலும், 30-க்கும் மேற்பட்ட நோய்களில் உறுப்பினா் மட்டும் பாதிக்கப்பட்டிருந்தால் அவா்களின் நோய்த் தீா்க்கும் வகையில் தற்காலிக இயலாமை உதவித்தொகை மருத்துவரின் சான்றுப்படி மாதம் ரூ.1,000 வழங்கப்படுகிறது.

திருப்பூா் மாவட்டத்தில் மேற்காணும் தகுதிகளை பூா்த்தி செய்யும் உறுப்பினா்கள் தங்களது வருவாய் கிராமத்தின் கிராம நிா்வாக அலுவலா்களையோ அல்லது சமூகப் பாதுகாப்புத் திட்ட தனி வட்டாட்சியா் அலுவலகத்தையோ அணுகிப் பயனடையலாம் என்று தெரிவிக்கப்பட்டுள்ளது.