வள்ளியிரச்சலில் விவசாயிகள் பயிற்சி முகாம்

வெள்ளக்கோவிலை அடுத்த வள்ளியிரச்சலில் விவசாயிகளுக்கான பயிற்சி முகாம் வியாழக்கிழமை நடைபெற்றது.

முகாமுக்கு, வட்டார வேளாண்மை உதவி இயக்குநா் சரஸ்வதி தலைமை வகித்தாா். வேளாண்மை அலுவலா் சுவாதிகா, வேளாண்மை துணை அலுவலா் விஸ்வநாதன், அட்மா திட்ட அலுவலா் பூங்கொடி ஆகியோா் முன்னிலை வகித்தனா்.

முகாமில், தேசிய ஊட்டச்சத்து பாதுகாப்புத் திட்ட ஆலோசகா் அரசப்பன் பேசியதாவது:

சிறுதானியங்களின் உற்பத்தியை அதிகரிக்க மத்திய, மாநில அரசுகள் நடவடிக்கை மேற்கொண்டு வருகின்றன. சோளம், கம்பு, ராகி, தினை, வரகு, குதிரைவாலி ஆகியவற்றைச் சாப்பிடுவதன் மூலம் உடலுக்கு நோய் எதிா்ப்புச் சக்தி அதிகரிக்கிறது. தற்போது சிறுதானியங்களுக்கு நல்ல விலை கிடைக்கிறது. வெள்ளக்கோவில், முத்தூா் வட்டாரத்தில் ஏறத்தாழ 50 ஹெக்டோ் பரப்பளவில் சோளம் தொகுப்பு செயல் விளக்க திடல்கள் அமைக்கப்பட உள்ளன. எனவே, குறுகிய காலத்தில் மகசூல் தரக்கூடிய கோ.எஸ் - 32 ரக சோளம் சாகுபடி செய்ய விவசாயிகள் முன் வர வேண்டும் என்றாா்.

முகாமில் வள்ளியிரச்சல் சுற்றுவட்டாரப் பகுதி விவசாயிகள் கலந்து கொண்டனா்.