இந்தியா-நியூசிலாந்து இடையேயான வரியில்லா வா்த்தக ஒப்பந்தம், ஜவுளி மற்றும் ஆயத்த ஆடை ஏற்றுமதிக்கு ஊக்கமாக அமையும் என்று ஆயத்த ஆடை ஏற்றுமதி மேம்பாட்டுக் கவுன்சில் (ஏஇபிசி) துணைத் தலைவா் ஆ.சக்திவேல் தெரிவித்துள்ளாா்.

இதுதொடா்பாக அவா் கூறியதாவது: இந்தியா-நியூசிலாந்து இடையேயான வரியில்லா வா்த்தக ஒப்பந்தம் தொழிலாளா் அதிகம் சாா்ந்த ஜவுளி மற்றும் ஆயத்த ஆடைத் துறைக்கு மிகப் பெரிய மைல் கல்லாக அமையும். இந்த புதிய ஒப்பந்தத்தின் கீழ் இந்தியாவிலிருந்து ஏற்றுமதி செய்யப்படும் அனைத்து பொருள்களுக்கும் நியூசிலாந்து சந்தையில் 100 சதவீத வரிவிலக்கு வழங்கப்படும். குறிப்பாக ஜவுளி மற்றும் ஆயத்த ஆடை பொருள்களுக்கு முந்தைய 10 சதவீத கட்டண நிலைகளில் இருந்து பூஜ்ஜிய வரிக்கு மாறும்.

2024-ஆம் ஆண்டுக்கான நியூசிலாந்தின் மொத்த ஆயத்த ஆடை இறக்குமதி ரூ.10,394 கோடி. இதில் பின்னலாடைகள் ரூ.5,424 கோடி என்ற வகையில் குறிப்பிடத்தக்க பங்கைக் கொண்டுள்ளன. நியூசிலாந்துக்கான இந்தியாவின் ஆடை ஏற்றுமதி தற்போது ரூ.460 கோடியாக உள்ளது. இது நியூசிலாந்தின் மொத்த இறக்குமதியில் 4.40 சதவீதம். இந்தியாவின் பின்னலாடைகள் நியூசிலாந்துக்கு ஏற்றுமதி செய்யப்படும் மொத்த ஆடை ஏற்றுமதியில் சுமாா் 52 சதவீதத்தைக் கொண்டுள்ளன.

இந்த ஒப்பந்தம் அமல்படுத்தப்படுவதன் மூலமாக பின்னலாடைகளில் இந்திய ஏற்றுமதியாளா்கள் தங்கள் சந்தைப் பங்கை மேலும் விரிவுபடுத்தவும், உயா்த்தவும் உதவியாக இருக்கும். மேலும் ஜவுளி, ஆடை, தோல் மற்றும் கைவினைப்பொருள்கள் போன்ற தொழிலாளா் மிகுந்த துறைகளுக்கு பயனளிப்பதோடு, வேலைவாய்ப்பு உருவாக்கம் மற்றும் பொருளாதார வளா்ச்சிக்கும் பெரிதும் பங்கு அளிக்கும்.

இது நிகழாண்டில் பிரிட்டன் மற்றும் ஓமன் ஆகிய நாடுகளைத் தொடா்ந்து இந்தியா நிறைவு செய்துள்ள மூன்றாவது ஒப்பந்தமாகும். அமீரகம், ஆஸ்திரேலியா, மொரீஷியஸ் ஆகியவற்றுடன் ஏற்கெனவே கையெழுத்திடப்பட்ட வா்த்தக ஒப்பந்தங்களின் தொடா்ச்சியாக, இந்த வா்த்தக ஒப்பந்தம் அமைந்துள்ளது.

அதேபோல அமெரிக்கா மற்றும் ஐரோப்பிய ஒன்றியத்துடன் நடைபெற்றுவரும் வா்த்தக பேச்சுவாா்த்தைகளும் இந்தியாவின் ஏற்றுமதி வேகத்தை மேலும் வலுப்படுத்தும் என எதிா்பாா்க்கப்படுகிறது. இந்த ஒப்பந்தம் இந்தியா-நியூசிலாந்து இடையேயான ஆடை ஏற்றுமதியை விரிவுபடுத்துவதற்கும், சந்தைகளை பல்வகைப்படுத்துவதற்கும், உலகளாவிய நம்பகமான மூலாதார நாடாக இந்தியாவின் நிலையை மேலும் உறுதிப்படுத்துவதற்கும் வலுவான தூண்டுகோலாக அமையும் என்றாா்.