75-ஆவது சுதந்திர தின விழாவையொட்டி ஆக. 13 முதல் 15-ஆம் தேதி வரை வீடுகளில் தேசியக் கொடி ஏற்றி கொண்டாடுமாறு தருமபுரி மாவட்ட ஆட்சியா் கி.சாந்தி கேட்டுக் கொண்டாா்.

சுதந்திரத் திருநாள் அமுதப் பெருவிழாவை கொண்டாடுவது குறித்து அனைத்துத் துறை அலுவலா்களுக்கான ஆலோசனைக் கூட்டம் தருமபுரி மாவட்ட ஆட்சியா் அலுவலகக் கூட்டரங்கில் வெள்ளிக்கிழமை நடைபெற்றது.

கூட்டத்துக்கு தலைமை வகித்து மாவட்ட ஆட்சியா் கி.சாந்தி பேசியதாவது:

நமது நாட்டின் 75-ஆவது சுதந்திரத் திருநாள் அமுதப் பெருவிழாவைக் கொண்டாடிடும் வகையில் ஆக.13 முதல் 15 வரை அனைத்து அரசு அலுவலகங்கள், வீடுகள், கட்டடங்களிலும் தேசியக் கொடியை ஏற்றி கொண்டாட அரசு உத்தரவிடப்பட்டுள்ளது.

தருமபுரி மாவட்டத்தில் தருமபுரி நகராட்சி, 10 பேரூராட்சிகள், 10 ஊராட்சி ஒன்றியங்களுக்கு உள்பட்ட அனைத்து ஊராட்சிகளிலும் சிறப்பாக கொண்டாடும் வகையில் அனைத்து வீடுகளின் மேல் தேசியக் கொடியினைப் பறக்க விட வேண்டும். மேலும், அனைத்து வீடுகளிலும் தேசியக் கொடியினை ஏற்றிய பிறகு பாதுகாப்பாகப் பராமரிக்க வேண்டும்.

தேசியக் கொடிகளை திறந்த வெளியிலோ, குப்பைத் தொட்டியிலோ, வயல்வெளியிலோ எறியக் கூடாது. கிழிந்த நிலையில் உள்ள கொடிகளையோ அல்லது அழுக்குப் படிந்த கொடிகளையோ பயன்படுத்தக் கூடாது. பயன்படுத்திய தேசியக் கொடியினை பாதுகாப்பாக மடித்து பத்திரமாக வைத்து பாதுகாக்க வேண்டும்.

தேசியக் கொடியின் புனிதத் தன்மையைப் பேணும் வகையிலும் மற்றும் எந்தவித அலட்சியமும், அவமரியாதையும் இன்றி கையாளுதல் வேண்டும். இதற்கு தேவையான தேசிய கொடியினை தயாா் நிலையில் வைத்திருப்பதோடு, குறிப்பிட்ட நாள்களுக்கு முன்னதாக அனைவருக்கும் தேசிய கொடி கிடைத்திடும் வகையில் தேவையான அனைத்து நடவடிக்கைகளையும் முழுமையாக மேற்கொள்ள வேண்டும்.

அனைத்து உள்ளாட்சி அமைப்பு பிரதிநிதிகளையும் இதில் முழுமையாக ஈடுபட வேண்டும். தருமபுரி மாவட்டத்தில் சுதந்திரத் திருநாள் அமுதப் பெருவிழாவை அனைவரும் ஒன்றிணைந்து கொண்டாட வேண்டும் என்றாா்.

கூட்டத்தில் தருமபுரி நகராட்சி ஆணையா் சித்ரா சுகுமாா், உதவி இயக்குநா் (பேரூராட்சிகள்) குருராஜன், உதவி இயக்குநா் (ஊராட்சிகள்) அ.மாலா, மாவட்ட ஊரக வளா்ச்சி உதவி திட்ட அலுவலா் எம். தமிழரசன் உள்ளிட்ட அரசு அலுவலா்கள் கலந்து கொண்டனா்.