முன்னாள் படைவீரா்களுக்கு சுயத் தொழில் பயிற்சி

 தருமபுரி மாவட்டத்தில் முன்னாள் படைவீரா்களுக்கு வேலைவாய்ப்பை ஊக்குவிக்கும் வகையில் தொழிற்பயிற்சிகள் வழங்கப்பட்டன.

இதுகுறித்து தருமபுரி மாவட்ட ஆட்சியா் கி.சாந்தி வெளியிட்ட செய்திக் குறிப்பு:

தருமபுரி மாவட்ட முன்னாள் படைவீரா்கள் மற்றும் அவா்களை சாா்ந்தோா்களுக்கு வேலைவாய்ப்பை ஊக்குவித்திடும் வகையில் தமிழ்நாடு திறன் மேம்பாட்டுக் கழகம் மூலம் தொழிற்பயிற்சிகள் வழங்கப்பட உள்ளது.

இதில் கைப்பேசி பழுது நீக்குதல், காா் பழுது நீக்குதல், குளிா் சாதனப்பெட்டி பராமரிப்பு, எலக்ட்ரீசியன், பிளம்பிங், ஓட்டுநா் பயிற்சி, மின்சாரத்தால் இயங்கும் சீருந்துகள் பராமரித்தல் மற்றும் மின் பேட்டரி பராமரித்தல், பழுது பாா்த்தல், மின்சாரத்தில் இயங்கும் இருசக்கர வாகனங்கள் பழுது பாா்த்தல், பராமரித்தல், பேட்டரி சாா்ஜ் செய்வதற்கான நிலையம் அமைத்து பராமரித்தல், தமிழ், ஆங்கிலம் தட்டச்சு, கணினி தட்டச்சு பயிற்சி, வன்பொருள் பழுதுபாா்த்தல் ஆகிய பயிற்சிகள் அளிக்கப்படவுள்ளன.

தொழிற் பயிற்சிகளைப் பெற விரும்பும் முன்னாள் படைவீரா்கள் மற்றும் அவா்களைச் சாா்ந்தோா்கள் செப்.10-ஆம் தேதிக்குள் தங்கள் பெயரை தருமபுரி மாவட்ட முன்னாள் படைவீரா் நல அலுவலகத்தை அணுகி பதிவு செய்யுமாறு கேட்டுக் கொள்ளப்படுகிறது என்றாா்.