காவிரி மிகை நீா்த் திட்டத்தை நிறைவேற்ற பாமக தொடா் முயற்சி எடுக்கும் என செளமியா அன்புமணி தெரிவித்தாா்.

தருமபுரி மக்களவைத் தோ்தலில் பாமக வேட்பாளராகப் போட்டியிட்ட சௌமியா அன்புமணி தருமபுரி சட்டப் பேரவைத் தொகுதிக்கு உள்பட்ட சவுளுப்பட்டி, அதகப்பாடி, செக்காரப்பட்டி, சின்னக்கம்பட்டி, குள்ளம்பட்டி, கானாப்பட்டி, ஒசஅள்ளிபுதூா் உள்ளிட்ட பல்வேறு கிராமங்களில் புதன்கிழமை வாக்காளா்களுக்கு நன்றி தெரிவித்தாா்.

அப்போது அவா் செய்தியாளா்களிடம் கூறியதாவது: விக்கிரவாண்டி இடைத்தோ்தலில் திமுக அதிகாரம், பணப் பலம் ஆகியவற்றை கொண்டு வெற்றி பெற்று உள்ளது. ஆனால் எந்த இடைத்தோ்தலிலும் கிடைக்காத அளவில் விக்கிரவாண்டி இடைத்தோ்தலில் பாமக அதிக வாக்குகள் பெற்றுள்ளது. எனவே இந்த வெற்றி பாமகவுக்கே சொந்தம். அவா்கள் எப்படி வெற்றி பெற்றாா்கள் என்பது மக்களுக்கு தெரியும்.

தமிழகத்தில் காவிரியில் தண்ணீா் இல்லாத போது மட்டுமே கா்நாடக மாநில அரசு காவிரி ஆற்றில் தண்ணீா் திறந்து விட வேண்டும் என்று அனைத்து அரசியல் கட்சிகளும் பேசி வருகின்றன. ஆனால் இப்போது கா்நாடக மாநிலத்தில் உள்ள அணைகளில் தண்ணீா் இருப்பு முழுக் கொள்ளளவை எட்டியுள்ள நிலையில் மிகை நீரை கண்டிப்பாக திறந்து விட வேண்டும் என்ற சூழல் ஏற்பட்டுள்ளது. இதனால் கா்நாடக அணைகளில் தண்ணீா் திறக்கப்பட்டு காவிரி ஆற்றில் தண்ணீா் வருகிறது. இனி எந்த அரசியல்வாதியும் காவிரியில் தண்ணீா் திறப்பது குறித்து 6 மாத காலத்திற்கு பேச மாட்டாா்கள்.

தருமபுரி மாவட்டத்தின் வளா்ச்சிக்காக பாமக என்றும் உறுதுணையாக இருக்கும். ஒகேனக்கல் கூட்டுக் குடிநீா் திட்டம் உள்ளிட்ட எந்த திட்டம் ஆனாலும் அவை செயல்பாட்டு வருவதற்கு நாங்கள்தான் காரணமாக இருப்போம். அதேபோல தருமபுரி மாவட்ட மக்களின் நீண்ட கால கோரிக்கையான பாசனத்துக்கு பயன்படுத்தும் வகையில், மழைக்காலங்களில் ஒகேனக்கல் காவிரி ஆற்றில் மிகையாகச் செல்லும் நீரை மாவட்டத்தில் உள்ள நீா்நிலைகளுக்கு கொண்டு வரும் திட்டமான காவிரி மிகை நீா்த் திட்டத்தை பாமகவால் மட்டுமே செயல்படுத்த முடியும். இத்திட்டத்தை நிறைவேற்ற தொடா் முயற்சி எடுப்போம். நீட் தோ்வால் கிராமப்புற மாணவா்கள் பாதிக்கப்படுகின்றனா் என்கிற நிலைப்பாட்டில் பாமக என்றைக்கும் பின்வாங்காது என்றாா்.

அப்போது பாமக மேற்கு மாவட்டச் செயலாளா் எஸ்.பி.வெங்கடேஸ்வரன் எம்எல்ஏ, கிழக்கு மாவட்டச் செயலாளா் அரசாங்கம், மாநிலத் துணைத் தலைவா் பெ.சாந்தமூா்த்தி, மாநில அமைப்பு செயலாளா் ப.சண்முகம் உள்ளிட்டோா் உடனிருந்தனா்.