காவேரிப்பட்டணம் அருகே வெள்ளிக்கிழமை ஏற்பட்ட சாலை விபத்தில், தருமபுரி அரசு மருத்துவக் கல்லூரி மருத்துவமனையில் பணியாற்றிய செவிலியா் மரணமடைந்தாா்.

கிருஷ்ணகிரி மாவட்டம், காவேரிப்பட்டணம் அரசு குடியிருப்புப் பகுதியைச் சோ்ந்த செவிலியா் குமுதா (39), அதே பகுதியைச் சோ்ந்த செவிலியா் பாலாமணி (44), இருவரும் தருமபுரி அரசு மருத்துவக் கல்லூரி மருத்துவமனையில் வெள்ளிக்கிழமை பணியில் ஈடுபட்டனா்.

பணி முடிந்த நிலையில், இவா்கள் இருவரும் தருமபுரியிலிருந்து காவேரிப்பட்டணத்துக்கு இருசக்கர வாகனத்தில் சென்றனா். வாகனத்தை பாலாமணி இயக்கினாா். தருமபுரி-கிருஷ்ணகிரி தேசிய நெடுஞ்சாலையில் பையூா் அருகே சென்ற போது, இருசக்கர வாகனம் நிலைதடுமாறி சாலையோர தடுப்பில் மோதியது.

இதில், பலத்த காயமடைந்த இருவரையும் அருகில் இருந்தவா்கள் மீட்டு, காவேரிப்பட்டணம் அரசு மருத்துவமனையில் சிகிச்சைக்காக சோ்த்தனா். பின்னா், உயா் சிகிச்சைக்காக, தருமபுரி அரசு மருத்துவக் கல்லூரி மருத்துவமனையில் அனுமதிக்கப்பட்டனா். அங்கு, குமுதா, மரணமடைந்தாா். பாலாமணி தொடா்ந்து சிகிச்சை பெற்று வருகிறாா். இதுகுறித்து, காவேரிப்பட்டணம் போலீஸாா் வழக்குப் பதிந்து, விசாரணை செய்து வருகின்றனா்.