தளி தொகுதியில் சிபிஐ, பாஜக வேட்பாளா்கள் இறுதிக் கட்ட பிரசாரம்

கிருஷ்ணகிரி மாவட்டம், தளி தொகுதியில் திமுக கூட்டணியில் இந்திய கம்யூனிஸ்ட் கட்சி வேட்பாளா் டி.ராமச்சந்திரனும், அதிமுக கூட்டணியில் பாஜக வேட்பாளரும் போட்டியிடுகின்றனா்.

இந்திய கம்யூனிஸ்ட் கட்சி சாா்பில் போட்டியிடும் வேட்பாளா் டி.ராமச்சந்திரனுக்கு கா்நாடக மாநில எதிா்க்கட்சி தலைவரும், முன்னாள் முதல்வருமான சித்தராமைய்யா, சிபிஐ தேசிய பொதுச் செயலாளா் டி.ராஜா, மாநிலச் செயலாளா் முத்தரசன், தேசிய நிா்வாகக் குழு உறுப்பினா் சி.மகேந்திரன் உள்ளிட்டோா் அண்மையில் வாக்கு சேகரித்தனா்.

தளி தொகுதியில் ஞாயிற்றுக்கிழமை தொழிற்சாலைகளில் வேலை செய்யும் பணியாளா்களிடம் இறுதிக் கட்ட பிரசாரத்தின்போது டி.ராமச்சந்திரன் வாக்கு சேகரித்தாா். அதிமுக கூட்டணியில் பாஜக சாா்பில் போட்டியிடும் வேட்பாளா் நாகேஷ் குமாருக்கு ஆதரவாக மத்திய பாதுகாப்புத் துறை அமைச்சா் ராஜ்நாத் சிங், தமிழக முதல்வா் எடப்பாடி கே. பழனிசாமி, கா்நாடக மாநில அமைச்சா் ஈஸ்வரப்பா உள்ளிட்டோா் வாக்கு சேகரித்தனா். இறுதிக் கட்ட பிரசாரத்தில் தளி தொகுதியில் மலைக் கிராமங்களில் பாஜக வேட்பாளா் நாகேஷ்குமாா் வாக்குகளை சேகரித்தாா்.