வேளாண் நிலையத்தில் உலக மண் வள தின கொண்டாட்டம்

நாமக்கல் வேளாண் அறிவியல் நிலையத்தில், உலக மண் வள தினம் சனிக்கிழமை கொண்டாடப்பட்டது.

இதில், விவசாயிகள், மாணவா்கள், பண்ணை மகளிா்கள், களப் பணியாளா்கள் பலா் கலந்து கொண்டனா். இதில் மண்வளத்தைப் பற்றி விழிப்புணா்வு ஏற்படுத்தப்பட்டது.

இந்நிகழ்ச்சியை வேளாண்மை அறிவியல் நிலைய முதுநிலை விஞ்ஞானி, தலைவா் அகிலா வரவேற்றாா். அவா் மண் வள தினம் கொண்டாடுவதின் அவசியத்தை எடுத்துரைத்தாா்.

நிகழ்ச்சியில் வேளாண்மை இணை இயக்குநா் பொ.அசோகன், தோட்டக்கலை துணை இயக்குநா் கே.கணேசன் ஆகியோா் கலந்து கொண்டு சிறப்புரையாற்றினா். மேலும் விவசாயிகளுக்கு மண்வள அட்டை வழங்கி மண் பரிசோதனை அடிப்படையில உரமிட்டு, நல்ல மகசூல் பெற்ற விவசாயிகளை கௌரவித்தனா். அத்துடன் மண்வளத்தை மேம்படுத்த உயிா் உரங்களையிட்டு மண்ணில் பல்லுயிா் தன்மையை பாதுகாக்க வலியுறுத்தினா்.

வேளாண்மை அறிவியல் நிலைய உதவிப் பேராசிரியா் சு.சத்யா மண் பரிசோதனையின் அவசியம் மண்வள பாதுகாப்பு யுக்திகள் குறித்து எடுத்துரைத்தாா். நாமக்கல் மாவட்டத்தின் மண்வளம் மற்றும் ஊட்டசத்து குறைப்பாட்டை சரிசெய்யும் முறைகள் குறித்து அறிவிப்பு பலகை வைக்கப்பட்டு தெளிவாக எடுத்துரைக்கப்பட்டது.

இந்த ஆண்டு மண்ணை உயிரோட்டமுள்ளதாக வைத்திருப்போம், மண்ணில் பல்லுயிா்களை பாதுகாப்போம் என்ற கருத்துருவை அனுசரிக்கும் வண்ணம் மண் பரிசோதனையின் முக்கியத்துவம், மண்வள மேம்பாட்டு, மானவாரி காலங்களில் மண்ணில் நீா்ப்பிடிப்பு திறனை மேம்படுத்தும் முறைகள், மண்வாழ் உயிரினங்களை பாதுகாத்தல் பற்றிய விளக்க உரைகளும் எடுத்துரைக்கப்பட்டன. இதில் மொத்தமாக 109 போ் கலந்து கொண்டு பயனடைந்தனா்.