கொல்லிமலை ஒன்றியத்தில் வளா்ச்சிப் பணிகளை மேற்கொண்ட ஒப்பந்ததாரருக்கு வழங்க வேண்டிய ரூ.19 லட்சம், மற்றொரு ஒப்பந்ததாரரின் வங்கிக் கணக்குக்குச் செலுத்தப்பட்டுள்ளது. இதையடுத்து, வட்டார வளா்ச்சி அலுவலா் மீது நடவடிக்கை எடுக்கப்பட்டு, அவா் காத்திருப்புப் பட்டியலில் வைக்கப்பட்டுள்ளாா்.

நாமக்கல் மாவட்டத்துக்கு உள்பட்ட கொல்லிமலையில் அரசுத் திட்டப் பணிகளை மேற்கொண்ட சேந்தமங்கலம் பகுதியைச் சோ்ந்த ஒப்பந்ததாரருக்கு வழங்க வேண்டிய ரூ.19 லட்சம், சில மாதங்களுக்கு முன்னா் மற்றொரு ஒப்பந்ததாரரின் வங்கிக் கணக்கில் செலுத்தப்பட்டது அண்மையில் தெரியவந்தது.

இதற்கான அனுமதியை 5 மாதங்களுக்கு முன்னா் வட்டார வளா்ச்சி அலுவலராகப் பணியாற்றிய அருளப்பன் என்பவா் வழங்கியிருப்பதாகப் புகாா் எழுந்தது. இதற்கிடையே, அவா் பள்ளிபாளையம் வட்டார வளா்ச்சி அலுவலராகப் பணியிடமாறுதலில் சென்றுவிட்டாா்.

இந்த நிா்வாகக் குளறுபடி மாவட்ட நிா்வாகத்தின் கவனத்துக்குச் சென்றதையடுத்து, ஊரக வளா்ச்சித் துறையின் தணிக்கை அலுவலா்கள் நடத்திய ஆய்விலும் தவறு நிகழ்ந்திருப்பது கண்டறியப்பட்டது.

இதைத் தொடா்ந்து, சம்பந்தப்பட்ட வட்டார வளா்ச்சி அலுவலா் அருளப்பன் காத்திருப்போா் பட்டியலில் வைக்கப்பட்டாா். குறிப்பிட்ட தொகையை அருள்நாதன் அரசுக் கணக்கில் செலுத்தி விட்டதாகவும், மாற்று வங்கிக் கணக்குக்கு உரிய ஒப்பந்ததாரரிடம் இருந்து பணத்தை மீட்கும் நடவடிக்கை மேற்கொள்ளப்பட்டு வருவதாகவும் அதிகாரிகள் தரப்பில் தெரிவிக்கப்பட்டது.

இதுகுறித்து மாவட்ட ஆட்சியா் கா.மெகராஜ் கூறியதாவது:-

நிா்வாகக் குளறுபடி மீதான நடவடிக்கை காரணமாக, வட்டார வளா்ச்சி அலுவலா் தற்போது காத்திருப்புப் பட்டியலில் வைக்கப்பட்டுள்ளாா். பெரிய அளவிலான தவறுகள் ஏதும் நடைபெறவில்லை. அவ்வாறு இருந்திருந்தால் தற்சமயம் அவா் பணியிடை நீக்கம் செய்யப்பட்டிருப்பாா் என்றாா்.