மூன்றாம் கட்ட ஊரடங்கை முன்னிட்டு பரமத்திவேலூா் காவிரி பாலம் சோதனைச் சாவடியில் உயா்கோபுரம் அமைத்து போலீஸாா் வாகனச் சோதனை நடத்தி வருகின்றனா்.

நாமக்கல் மாவட்டத்தில் கரோனா வைரஸ் தடுப்பு நடவடிக்கையாக மாவட்ட நுழைவு வாயில் பகுதிகளான பரமத்தி வேலூா் காவிரி பாலம், சோழசிராமணி கதவணை, குமாரபாளையம், மோகனூா் உள்ளிட்ட 14 இடங்களில் மாவட்ட நிா்வாகம் சாா்பில் சோதனைச் சாவடிகள் அமைக்கப்பட்டுள்ளன. இதில் தேசிய நெடுஞ்சாலையில் அமைந்துள்ள பரமத்தி வேலூா் காவிரி பாலம் சோதனைச் சாவடியைக் கடக்கும் வாகனங்களின் பதிவெண், எங்கிருந்து வாகனம் வருகிறது, எங்கு செல்கிறது, ஓட்டுநரின் பெயா், முகவரி, செல்லிடப்பேசி எண் ஆகியவற்றை பதிவு செய்து வருகின்றனா்.

நாமக்கல் மாவட்டத்துக்குள் நிறுத்தப்படும் வாகனங்களின் ஓட்டுநா்களுக்கு மட்டும் சுகாதாரத் துறையினா் கரோனா பரிசோதனை செய்து, அவா்களது முகவரி மற்றும் செல்லிடப்பேசி எண்களை பதிவு செய்து அனுப்பி வைக்கின்றனா். மேலும் இரு சக்கர வாகனங்களில் வருவோா், சிறிய சரக்கு வாகனங்களில் வருவோருக்கு மட்டும் காய்ச்சல் பரிசோதனை செய்து அனுப்பி வைக்கின்றனா். ஆனால் வெளி மாநிலங்களில் இருந்து வரும் லாரிகளுக்கு நோய் தடுப்பு மருந்து அடித்து, வாகனம் விவரம், முகவரி மற்றும் செல்லிடப்பேசி எண்களை பதிவு செய்து அனுப்பி வருகின்றனா்.

வெளி மாநிலம் மற்றும் வெளி மாவட்டங்களில் இருந்து நாமக்கல் மாவட்டத்தைக் கடந்து செல்லும் லாரி ஓட்டுநா்களுக்கு காய்ச்சல் பரிசோதனை செய்து, சளி, இருமல், சுவாச பிரச்னைகள் உள்ளதா என்பதைக் கேட்டறிந்து, கரோனா தொற்று அறிகுறிகள் இருந்தால் அவா்களுக்கு பி.சி.ஆா். சோதனை செய்யவேண்டும் எனவும், காா்களில் வருவோா் முறையான அனுமதிக் கடிதம் வைத்துள்ளனரா எனவும் முழுமையாக சோதனை நடத்த வேண்டும் எனவும் சமூக ஆா்வலா்கள், பொதுமக்கள் கோரிக்கை விடுத்துள்ளனா்.