வேலை உறுதி திட்டப் பணியாளா்களுக்கு ஊதியம் வழங்க மறுப்பு

புதுச்சத்திரம் ஊராட்சி ஒன்றியத்துக்கு உள்பட்ட கதிராநல்லூா் கிராமப் பகுதியில் வேலை உறுதி திட்டப் பணியாளா்களுக்கு ஊதியம் வழங்க மறுப்பு தெரிவித்ததால், 100-க்கும் மேற்பட்ட பணியாளா்கள் புதுச்சத்திரம் ஒன்றிய அலுவலகத்தை முற்றுகையிட்டு போராட்டத்தில் ஈடுபட்டனா்.

கதிராநல்லூா் ஊராட்சிப் பகுதியில் வேலை உறுதி திட்டத்தில் பணியாற்றும் பெண்கள் ஏரியை தூய்மைப்படுத்தும் பணியில் ஈடுபடுத்தியிருந்த நிலையில், ஊராட்சி மன்றத் தலைவா் அங்குள்ள மாரியம்மன் கோயில் சுற்றுப்புறத்தை தூய்மைப்படுத்த வேண்டும் என 100-க்கும் மேற்பட்டோருக்கு உத்தரவிட்டாராம். இதனையடுத்து, அவா்கள் கோயில் தூய்மைப் பணியில் ஈடுபட்டனா்.

அப்போது, ஊராட்சி திட்ட மேற்பாா்வையாளா் லோகநாதன், ஏரிக்கு சென்று பாா்த்த போது 22 போ் மட்டுமே தூய்மைப் பணியில் ஈடுபட்டிருந்ததைக் கண்டு, பிறருக்கு ஊதியம் வழங்க முடியாது என தெரிவித்துள்ளாா். மேலும், வேலை திட்ட அடையாள அட்டையை திருப்பி பெற்றுக்கொண்டாா்.

இதனால் பிற பெண் பணியாளா்கள், புதுச்சத்திரம் ஊராட்சி ஒன்றிய அலுவலகம் சென்று அதிகாரிகளுடன் வாக்குவாதத்தில் ஈடுபட்டனா். இதனையடுத்து, அனைவருக்கும் அடையாள அட்டை திருப்பி வழங்கியதுடன், ஒரு நாள் ஊதியமும் வழங்கப்படும் என அதிகாரிகள் உறுதியளித்தனா்.