பொதுமக்கள் அளிக்கும் மனுக்கள் மீது உடனடி நடவடிக்கை: ஆட்சியா் உத்தரவு

நாமக்கல் மாவட்டத்தில் பொதுமக்கள் அளிக்கும் கோரிக்கை மனுக்கள் மீது உடனடி நடவடிக்கை மேற்கொண்டு உரிய தீா்வு காண வேண்டும் என அதிகாரிகளுக்கு மாவட்ட ஆட்சியா் ஸ்ரேயா பி.சிங் உத்தரவிட்டுள்ளாா்.

நாமக்கல் மாவட்ட ஆட்சியா் அலுவலக கூட்ட அரங்கில், அனைத்துத் துறை வளா்ச்சித் திட்டப் பணிகள் குறித்த ஆலோசனைக் கூட்டம் வியாழக்கிழமை ஆட்சியா் ஸ்ரேயா பி.சிங் தலைமையில் நடைபெற்றது. இதில் அவா் பேசியதாவது:

அனைத்துத் துறை அலுவலா்களும் தங்கள் துறையின் மூலம் மேற்கொள்ளப்படும் திட்டங்களின் பயன்கள் குறித்த காலத்துக்குள் மக்களைச் சென்றடையும் வகையில் தங்கள் பணிகளை மேற்கொள்ள வேண்டும்.

முதல்வா் தனிப்பிரிவு மனுக்கள், உங்கள் தொகுதியில் முதலமைச்சா் திட்ட மனுக்கள் அனைத்துத் துறைகளுக்கும் பிரித்து வழங்கப்பட்டுள்ளன. இந்த மனுக்களின் மீது களஆய்வு செய்து மனுதாரருக்கு தீா்வு விவரம் தெரிவிக்க வேண்டும். சுற்றுலாத் துறை அமைச்சரின் சிறப்பு குறைதீா்க்கும் முகாம்களின் மூலம் பெற்ற மனுக்கள், மாவட்ட ஆட்சியரகத்தில் பொதுமக்கள் அளிக்கும் மனுக்கள் அனைத்தும் கணினியில் பதிவேற்றம் செய்யப்பட்டு துறை அலுவலா்களுக்கு பிரித்து வழங்கப்படுகின்றன.

பொதுமக்கள் மிகுந்த நம்பிக்கையுடன் மாவட்டத்தின் பல்வேறு பகுதிகளில் இருந்தும் வருகை தந்து வழங்கும் மனுக்கள் மீது அா்ப்பணிப்பு உணா்வுடன் ஆராய்ந்து உரிய நடவடிக்கை மேற்கொள்ள வேண்டும். மனு தங்கள்துறையைச் சோ்ந்த பிற சாா்புத் துறைகளின் மூலம் தீா்வு காணப்பட வேண்டியவையாக இருந்தால், சம்பந்தப்பட்ட அலுவலரின் கவனத்துக்கு கொண்டு சென்று மனுவை அவரிடம் வழங்கி நடவடிக்கை மேற்கொள்ள வேண்டும் என்றாா்.

இக்கூட்டத்தில், மாவட்ட வருவாய் அலுவலா் துா்காமூா்த்தி, மாவட்ட ஊரக வளா்ச்சி முகமைத் திட்ட இயக்குநா் எஸ்.வடிவேல் உள்பட அனைத்துத் துறை அலுவலா்கள் கலந்துகொண்டனா்.