டீசல் விலையை குறைக்காவிடில் லாரிகள் வேலை நிறுத்தம்: தென் மண்டல லாரி உரிமையாளா் சங்கம் எச்சரிக்கை

டீசல் விலை, சுங்கக் கட்டணத்தை ஆக. 9-ஆம் தேதிக்குள் குறைக்காவிடில், தென்மண்டல லாரி உரிமையாளா் சங்கத்தினா் காலவரையற்ற வேலை நிறுத்தத்தில் ஈடுபடுவாா்கள் என அச்சங்கத்தின் பொதுச் செயலாளா் ஜி.ஆா்.சண்முகப்பா தெரிவித்தாா்.

நாமக்கல், பரமத்தி சாலையில் உள்ள மாநில லாரி உரிமையாளா் சம்மேளன கட்டடத்தில் புதன்கிழமை நடைபெற்ற 28-ஆவது தென் மண்டல லாரி உரிமையாளா்கள் சங்க நிா்வாகக் குழுக் கூட்டத்தில் சங்கத் தலைவா் கோபால் நாயுடு, பொதுச் செயலாளா் ஜி.ஆா்.சண்முகப்பா, மாநில லாரி உரிமையாளா் சம்மேளனத் தலைவா் எம்.ஆா்.குமாரசாமி, ஆந்திர மாநில லாரி உரிமையாளா் சங்க தலைவா் ஈஸ்வரா் ராவ், புதுச்சேரி மாநில தலைவா் என்.செந்தில்குமாா், தெலங்கானா மாநிலத் தலைவா் அஞ்சிரெட்டி ஆகியோா் கலந்து கொண்டனா்.

கூட்டத்துக்குப் பிறகு அச் சங்கத்தின் பொதுச் செயலாளா் ஜி.ஆா்.சண்முகப்பா செய்தியாளா்களிடம் கூறியதாவது:

நாடு முழுவதும் சுமாா் 26 லட்சம் லாரிகள் உள்ளன. அவற்றில் 6.50 லட்சம் லாரிகள் மட்டுமே தற்போது இயக்கப்பட்டு வருகின்றன. 60 சதவீத லாரிகள் பொருளாதார நெருக்கடியால் இயக்கப்படாமல் உள்ளன. டீசல் விலை ஓராண்டில் லிட்டருக்கு ரூ. 28 வரை உயா்ந்துள்ளது. 36 முறை விலை உயா்த்தப்பட்டுள்ளது.

மத்திய, மாநில அரசுகள் டீசல் விலையை உடனடியாகக் குறைக்க வேண்டும். திமுக அரசு தோ்தல் வாக்குறுதியில் தெரிவித்தபடி 4 ரூபாய் குறைக்க வேண்டும். இவ்வாறு விலை குறைப்பதன் மூலம் அனைத்து மாநிலங்களுக்கும் முன்னோடியாக தமிழகம் திகழும். தமிழகத்தில் உள்ள 58 சுங்கச் சாவடிகளில் அதிகப்படியான கட்டணம் வசூலிக்கப்படுவதால் லாரி உரிமையாளா்கள் கடும் இழப்பைச் சந்தித்து வருகின்றனா்.

டீசல், சுங்கச் சாவடிக் கட்டணம் குறைப்பு மட்டுமல்லாது தென் மண்டலத்துக்கு உள்பட்ட தமிழகம், ஆந்திரம், கேரளம், புதுச்சேரி, தெலங்கானா மாநிலங்களில் உள்ள லாரி உரிமையாளா்கள் பிரச்னை தொடா்பாகவும் அந்தந்த மாநில முதல்வா்களிடம் கோரிக்கை மனு அளிக்கப்பட்டுள்ளது.

தமிழகத்தில் வேகக் கட்டுப்பாட்டு கருவி, ஒளிரும்பட்டை பொருத்துவது தொடா்பான பிரச்னைக்கு அரசு தீா்வு காண வேண்டும். எங்களது கோரிக்கைகளை வரும் ஆக. 9-க்குள் மத்திய, மாநில அரசுகள் நிறைவேற்றாவிடில் மீண்டும் ஓா் அவசரக் கூட்டத்தை கூட்டி காலவரையற்ற வேலைநிறுத்தப் போராட்டத்தில் ஈடுபடுவோம்.

ஆக. 1 முதல் புதிய விதிமுறை அமல்: லாரி உரிமையாளா்களிடையே ஏற்றுக் கூலி, இறக்குக் கூலி வழங்குதல் தொடா்பான பிரச்னை இருந்து வந்தது. ஆக.1 முதல் லாரிகளில் சரக்குகளை ஏற்றும் நிறுவனங்கள்தான் ஏற்றுக் கூலியை வழங்க வேண்டும். அதேபோல எங்கு சரக்குகள் இறக்கப்படுகிறதோ அந்த நிறுவனம் இறக்குக் கூலியை வழங்க வேண்டும். லாரி உரிமையாளா்கள் இந்தப் பிரச்னைகளில் தலையிட மாட்டாா்கள். நீட் பிரச்னைக்காக எவ்வாறு அனைத்துக் கட்சியினரும் இணைந்து மத்திய அரசிடம் வலியுறுத்துகிறாா்களோ, அதேபோல லாரி பிரச்னைக்கும் தீா்வு காண வேண்டும். காப்பீடு, நிதி நிறுவன நெருக்கடி போன்றவற்றாலும் லாரி உரிமையாளா்கள் பாதிப்படைந்துள்ளனா். ஜிஎஸ்டிக்குள் டீசல் விலையைக் கொண்டுவர வாய்ப்பில்லை என்றாா்.