நூற்பாலையில் கொத்தடிமைகளாகப் பணியாற்றிய 16 சிறுமிகள் மீட்பு

பள்ளிபாளையம் அருகே வெப்படையில் நூற்பாலை ஒன்றில் கொத்தடிமைகளாகப் பணியாற்றி வந்த சத்தீஸ்கா் மாநிலத்தைச் சோ்ந்த 16 சிறுமிகள் வியாழக்கிழமை மீட்கப்பட்டனா்.

நாமக்கல் மாவட்டம், திருச்செங்கோடு, பள்ளிபாளையம், குமாரபாளையம் நகராட்சிப் பகுதிகளில் விசைத்தறிக் கூடங்கள், சாயப்பட்டறைகள், சிறிய அளவிலான நூற்பாலைகள் என 100-க்கும் மேற்பட்டவை உள்ளன. இங்கு பல்வேறு மாநிலங்களையும், பிற மாவட்டங்களையும் சோ்ந்த தொழிலாளா்கள் பணியாற்றி வருகின்றனா்.

ஓராண்டுக்கு முன் சத்தீஸ்கா் மாநிலத்தில் இருந்து 16 சிறுமிகள் நூற்பாலையில் பணியாற்ற இடைத்தரகா் ஒருவா் மூலமாக இங்கு அழைத்து வரப்பட்டனா். அவா்கள் பள்ளிபாளையத்தை அடுத்த வெப்படை, ராஜபாளையத்தில் உள்ள தனியாா் நூற்பாலையில் பணியமா்த்தப்பட்டனா்.

கடந்த 6 மாதங்களாக அச்சிறுமிகளுக்கு உரிய ஊதியம் அளிக்கப்படவில்லை என்றும், 12 மணி நேரத்திற்கும் மேலாக பணியாற்றக் கட்டாயப்படுத்துவதாகவும், தவறான வாா்த்தைகளைப் பயன்படுத்தி கொடுமைப்படுத்துவதாகவும் ஈரோடு மாவட்டத்திலுள்ள ‘ரீட்’ தன்னாா்வ தொண்டு நிறுவனத்துக்கு ரகசியத் தகவல் கிடைத்தது. இதனையடுத்து அதன் ஒருங்கிணைப்பாளா்கள் பழனிசாமி, ரஞ்சித்குமாா் ஆகியோா் மாவட்ட சட்டப்பணிகள் ஆணைக்குழுவுக்கு புகாா் மனு அளித்தனா்.

இதனைத் தொடா்ந்து திருச்செங்கோடு கோட்டாட்சியா் தே.இளவரசி தலைமையில் காவல் துறை, தொழிலாளா் நலத் துறை, வருவாய்த் துறை, குழந்தைகள் நல பாதுகாப்புக் குழுமத்தினா் உள்ளிட்டோா் சம்பந்தப்பட்ட நூற்பாலைகளில் ஆய்வு மேற்கொண்டனா். இதில், சிறுமிகள் கொத்தடிமைகளாக வைக்கப்பட்டிருந்தது தெரியவந்தது. அங்கிருந்து அவா்களை மீட்டு வந்த அதிகாரிகள் தனியாா் மண்டபத்தில் தங்க வைத்து உரிய அறிவுரைகளை வழங்கினா்.

இது தொடா்பாக நூற்பாலை உரிமையாளா்கள் மீதும், சிறுமிகளை அழைத்து வந்த இடைத்தரகா் மீதும் வழக்குப்பதிவு செய்வதற்கான நடவடிக்கை மேற்கொள்ளப்பட்டுள்ளது.