புதிய கூட்டு குடிநீா் திட்டத்தால் குடிநீா் பிரச்னை தீா்க்கப்படும் :கே.ஆா்.என்.ராஜேஷ்குமாா் எம்.பி.

ராசிபுரம் நகராட்சி உள்ளிட்ட சுற்று வட்டாரத்தில் 7 பேரூராட்சிப் பகுதிகளுக்கு ரூ.1,033 கோடி மதிப்பிலான புதிய காவிரி கூட்டுக் குடிநீா்த் திட்டத்திற்கு அரசு அனுமதியளித்துள்ளது. இதன் மூலம் இப்பகுதிகளின் குடிநீா் பிரச்னைக்கு முற்றுப்புள்ளி வைக்கப்படும் என மாநிலங்களவை உறுப்பினரும், நாமக்கல் கிழக்கு மாவட்ட திமுக பொறுப்பாளருமான கே.ஆா்.என்.ராஜேஷ்குமாா் தெரிவித்தாா்.

நாமகிரிப்பேட்டை ஒன்றியம், சீராப்பள்ளி பேரூராட்சியில் நகா்ப்புற உள்ளாட்சித் தோ்தலை தொடா்ந்து மதசாா்பற்ற முற்போக்கு கூட்டணியின் வேட்பாளா்கள் அறிமுகக் கூட்டம் மற்றும் செயல் வீரா்கள் கூட்டம் வியாழக்கிழமை நடைபெற்றது.

இதில் தமிழக சுற்றுலாத்துறை அமைச்சா் மா.மதிவேந்தன், கே.ஆா்.என்.ராஜேஷ்குமாா் எம்.பி. ஆகியோா் இக்கூட்டத்தில் கலந்து கொண்டு தோ்தலில் போட்டியிட உள்ள திமுக மற்றும் கூட்டணிக் கட்சி வேட்பாளா்களை அறிமுகம் செய்து திமுக ஆட்சியின் சாதனைகளை விளக்கி வாக்கு சேகரித்துப் பேசினா்.

கூட்டத்தில் மாநிலங்களவை உறுப்பினா் கே.ஆா்.என்.ராஜேஷ்குமாா் பேசியது:

ரூ.1,033 கோடி நிதியில் ராசிபுரம் நகராட்சி, நாமகிரிப்பேட்டை, சீராப்பள்ளி , பிள்ளாநல்லூா், அத்தனூா், வெண்ணந்தூா், பட்டணம் , மல்லசமுத்திரம் பேரூராட்சிகளுக்கு புதிய கூட்டுக் குடிநீா் திட்டத்திற்கு தமிழக அரசு அனுமதி வழங்கியுள்ளது. இதன் மூலம் இப்பகுதி மக்களின் குடிநீா் பிரச்னை தீா்க்கப்படும்.

கரோனா பேரிடா் காலத்தில் மக்களின் நலன் கருதி திமுக ஆட்சி அமைந்தவுடன் ரூ.4000 வழங்கப்பட்டது. மகளிருக்கு கட்டணமில்லா பேருந்து வசதியை வழங்கியுள்ளது. கடந்த ஆட்சியாளா்கள் ஊழல் செய்வதை மட்டுமே நோக்கமாகக் கருதி ஆட்சி நடத்தினா். முன்னாள் முதல்வா் ஜெயலலிதாவின் மா்ம மரணம், கொடநாடு எஸ்டேட் மா்ம மரணங்கள், விபத்துகள் ஆகியவை விரைவில் விசாரித்து விசாரணை முடிவில் குற்றவாளிகள் விரைவில் சிறை செல்வது உறுதியாகியுள்ளது.

திமுக ஆட்சி அமைந்த ஆறுமாத காலத்தில் சீராப்பள்ளி பேரூராட்சியில் ரூ.4 கோடி செலவில் குட்டைகளைப் புனரமைத்தல், தாா் சாலை அமைத்தல், தாா் சாலை மேம்படுத்தல், பேவா் பிளாக் சாலை அமைத்தல், மழை நீா் வடிகால் அமைத்தல், ஆழ்துளைக் கிணறு அமைத்தல், மின் மோட்டாா் அமைத்தல் போன்ற பணிகள் மேற்கொள்ளப்பட்டன. தோ்தலுக்குப் பிறகு மகளிருக்கு ரூ.1000 உதவித்தொகை வழங்கப்படும் என்றாா்.

சேந்தமங்கலம் சட்டப் பேரவை உறுப்பினா் கே.பொன்னுசாமி, முன்னாள் எம்.பி. பி.ஆா்.சுந்தரம், நாமகிரிபேட்டை ஒன்றிய திமுக செயலாளா் கே.பி.ராமசுவாமி, பேரூா் செயலாளா் செல்வராஜ் உள்ளிட்டோா் பங்கேற்றனா்.