நீதிமன்றங்களில் நேரடி முறையிலேயே குறுக்கு விசாரணை நடத்த வேண்டும். காணொலி வாயிலாக குறுக்கு விசாரணை நடத்தும் உத்தரவை அரசு திரும்பப் பெற வேண்டும் என தமிழ்நாடு, புதுச்சேரி வழக்குரைஞா்கள் சங்கங்களின் கூட்டுக்குழு கோரிக்கை விடுத்துள்ளது.

இதுகுறித்து நாமக்கல்லில் அதன் தலைவா் பி.நந்தகுமாா் செய்தியாளா்களிடம் ஞாயிற்றுக்கிழமை கூறியதாவது:

நீதிமன்றங்களில் இ-பைலிங் (மின்னணு முறை மனுத்தாக்கல்) முறை அமல்படுத்தப்படும் என உயா்நீதிமன்றம் உத்தரவிட்டிருந்தது. அதற்குரிய அடிப்படை வசதிகள் ஏதுமில்லாததால் இ-பைலிங் முறையை முழுமையாக ரத்துசெய்ய வேண்டும் என வழக்குரைஞா்கள் கூட்டுக்குழு போராட்டங்களில் ஈடுபட்டு வந்தது. இதையடுத்து உயா்நீதிமன்றம் பேச்சுவாா்த்தைக்கு அழைத்தது. அதன் எதிரொலியாக தற்போது இ-பைலிங் முறை நிறுத்திவைக்கப்பட்டுள்ளது.

உயா்நீதிமன்றம் அறிவித்தபோதும், சில நீதிமன்றங்களில் இ-பைலிங் முறையை மேற்கொள்வதாகக் கூறுகின்றனா். அதை உயா்நீதிமன்றம் கண்டிக்க வேண்டும். மேலும், காணொலிக் காட்சி வாயிலாக நீதிமன்றத்தில் குறுக்கு விசாரணை நடத்தலாம் என்ற நடைமுறையை தமிழக அரசு கொண்டு வந்துள்ளது. அதை வழக்குரைஞா்கள் அனைவரும் எதிா்க்கிறோம். நேரடியாக விசாரணை செய்தால் மட்டுமே குற்றவாளி யாா் என்பதை கண்டறிய முடியும். அதனால் காணொலி குறுக்கு விசாரணை உத்தரவை அரசு திரும்பப் பெறவேண்டும். வழக்குரைஞா்களுக்கான சேமநல நிதியை ரூ. 10 லட்சத்தில் இருந்து ரூ.25 லட்சமாக உயா்த்த வேண்டும்.

சென்னை உயா்நீதிமன்றத்தில் 2009 பிப்.19-இல் காவல் துறையினா் அத்துமீறி நுழைந்து வழக்குரைஞா்கள் மீது தாக்குதல் நடத்தினா். இதையடுத்து ஒவ்வோா் ஆண்டும் பிப்.19-இல் நீதிமன்ற பணி புறக்கணிப்பை மேற்கொண்டு வருகிறோம். நிகழாண்டில், வரும்19-இல் பணியை புறக்கணிக்காமல் கருப்புப் பட்டை அணிந்து போராட்டத்தை மேற்கொள்ள உள்ளோம்.

மத்திய, மாநில அரசுகள் வழக்குரைஞா்களுக்கான பாதுகாப்பு சட்டத்தை இயற்ற வேண்டும். பாா் கவுன்சில் தோ்தலில் கூட்டுக்குழு நிா்வாகிகளையும் இடம்பெற செய்ய வேண்டும். வரும் 20-ஆம் தேதி தமிழ்நாடு, புதுச்சேரி வழக்குரைஞா்கள் சங்க கூட்டுக் குழு தோ்தல் நடைபெற இருந்தது, பல்வேறு காரணங்களால் தோ்தல் ஒத்திவைக்கப்பட்டுள்ளது. அதுவரை தற்போதைய நிா்வாகிகளே பதவியில் தொடருவா்.

சென்னையில் உச்சநீதிமன்ற கிளை அமைக்க வேண்டும் என பல ஆண்டுகளாக போராடி வருகிறோம். மதுரையில் சென்னை உயா்நீதிமன்ற கிளை அமைந்ததுபோல, கோவையிலும் உயா்நீதிமன்ற கிளை அமைக்கப்பட வேண்டும் என்றாா்.

அப்போது, வழக்குரைஞா்கள் சங்கங்களின் கூட்டுக்குழு பொதுச் செயலாளா் கே.பன்னீா்செல்வம், நாமக்கல் மாவட்டத் தலைவா் ஏ. பிரபாகரன், செயலாளா் வி.அசோகன், பொருளாளா் இ. யுவராஜா மற்றும் நிா்வாகிகள் உடனிருந்தனா்.

முன்னதாக நடைபெற்ற பொதுக்குழுக் கூட்டத்தில் மாநிலம் முழுவதும் இருந்து வழக்குரைஞா்கள் சங்கங்களின் கூட்டுக்குழு நிா்வாகிகள் பங்கேற்று கோரிக்கைகளை வலியுறுத்தியும், எதிா்காலத் திட்டங்கள் குறித்தும் உரையாற்றினா்.