ஓமலூர் அருகே கதிர் செட்டிப்பட்டி கதிர்பெருமாள் கோயிலுக்கு செல்ல ரூ.12 லட்சத்தில் தார்ச் சாலை அமைக்கும் பணியை சேலம் மேற்கு தொகுதி எம்.எல்.ஏ. ஜி.வெங்கடாசலம் சனிக்கிழமை துவக்கி வைத்தார்.
ஓமலூர் அருகேயுள்ள கதிர்செட்டிப்பட்டி பகுதியில் சுமார் ஐநூறு குடும்பத்தினர் வசித்து வருகின்றனர்.
இந்தக் கிராமத்தில் உள்ள மலையில் நூற்றாண்டுகள் பழமையான கதிர்பெருமாள் கோயில் அமைந்துள்ளது. இந்தக் கோயிலுக்கு சேலம் மாவட்டத்தின் பல்வேறு பகுதிகளில் இருந்தும் பொதுமக்கள் வந்து செல்கின்றனர். இந்த நிலையில் இந்தக் கோயிலுக்கு செல்லும் சாலையை தார்ச்சாலையாக தரம் உயர்த்த வேண்டும் என்று அந்தப் பகுதி பொதுமக்கள் கடந்த 20 ஆண்டுகளாக கோரிக்கை வைத்து வருகின்றனர். இதனை தொடர்ந்து சேலம் மேற்கு தொகுதி எம்.எல்.ஏ. வெங்கடாசலம் கோயிலுக்கு செல்லும் மண்பாதையை தார்ச்சாலையாக மாற்ற அவரது தொகுதி மேம்பாட்டு நிதியில் இருந்து ரூ.12 லட்சம் நிதி ஒதுக்கீடு செய்தார். இதனைத் தொடர்ந்து தார்ச்சாலை அமைக்கும் பணியை தொடங்கி வைத்தார். நீண்டகால கோரிக்கையான புதிய தார்ச் சாலைப்பணியை நிறைவேற்றிக்கொடுத்த வெங்கடாசலம் எம்.எல்.ஏ.வுக்கு அந்த பகுதி பொதுமக்கள் நன்றி தெரிவித்தனர்.