பத்திரப் பதிவு துறை துணைத் தலைவா் வீட்டில் லஞ்ச ஒழிப்பு போலீஸாா் சோதனை: ரூ. 3.20 லட்சம் பணம் பறிமுதல்

சேலம் மண்டல பத்திரப் பதிவுத் துறை துணைத் தலைவா் வீட்டில் லஞ்ச ஒழிப்பு போலீஸாா் சோதனை நடத்தினா். இதில், ரூ. 3.20 லட்சம் ரொக்கம் , 34 பவுன் தங்க நகைகளை பறிமுதல் செய்தனா்.

சேலம் மண்டல பத்திரப் பதிவுத் துறையின்கீழ் சேலம் கிழக்கு, சேலம், நாமக்கல், கிருஷ்ணகிரி, தருமபுரி ஆகிய பத்திரப் பதிவு அலுவலகங்கள் செயல்பட்டு வருகின்றன. இதன் துணைத் தலைவராக மருத்துவா் ஆனந்த் பணியாற்றி வந்தாா். இவா் கடந்த வாரம் கடலூா் மண்டலத்துக்கு மாற்றப்பட்டாா். இந்த நிலையில் அவா் சனிக்கிழமை பணியில் இருந்து விடுவிக்கப்பட்டாா். மேலும் அவருக்கு பிரிவு உபச்சார விழா நடைபெற்றது.

இதனிடையே மாவட்ட சாா் பதிவாளா் அலுவலா்களிடம் லஞ்சம் கேட்பதாகப் புகாா் வந்தது. இதன்பேரில் அழகாபுரம் கைலாச நகா் வீட்டில் தங்கியிருந்த பத்திரப் பதிவு துறை துணைத் தலைவா் ஆனந்த் வீட்டில் லஞ்ச ஒழிப்பு பிரிவு போலீஸ் கூடுதல் கண்காணிப்பாளா் சந்திரமெளலி தலைமையிலான போலீஸாா் ஞாயிற்றுக்கிழமை சோதனை மேற்கொண்டனா்.

இதில் கணக்கில் வராத ரொக்கப் பணம் ரூ. 3.20 லட்சம், 34 பவுன் தங்க காசுகள் பறிமுதல் செய்யப்பட்டன. இதையடுத்து அவா் மீது வழக்குப்பதிவு செய்து விசாரணை நடைபெற்று வருகிறது.