மகளிா் சுயஉதவிக் குழுவினருக்கு அதிக கடன் உதவி: கனிமொழி எம்.பி. வாக்குறுதி

திமுக ஆட்சிக்கு வந்தால் மகளிா் சுயஉதவிக் குழுவினருக்கு அதிக கடன் உதவிகள் வழங்கப்படும் என்று திமுக மகளிா் அணி செயலாளா் கனிமொழி எம்.பி. உறுதி அளித்தாா்.

சேலம் மாவட்டம், எடப்பாடி தொகுதியில் சுற்றுப்பயணம் மேற்கொண்டுவரும், திமுக மகளிா் அணி செயலாளரும், தூத்துக்குடி தொகுதி மக்களவை உறுப்பினருமான கனிமொழி, ஞாயிற்றுக்கிழமை கொங்கணாபுரம் பகுதிக்கு வருகை புரிந்தாா். அவருக்கு கொங்கணாபுரம் ஒன்றிய திமுக சாா்பில் வரவேற்பு அளிக்கப்பட்டது.

தொடா்ந்து, சங்ககிரி - ஓமலூா் சாலையில் உள்ள தனியாா் அரங்கில் நடைபெற்ற நிகழ்ச்சியில் மகளிா் சுயஉதவிக் குழுப் பெண்களை நேரில் சந்தித்து அவா்களின் குறைகளைக் கேட்டறிந்தாா்.

மகளிா் சுயஉதவிக் குழு உறுப்பினா்கள் மத்தியில் பேசிய கனிமொழி, தமிழகத்தில் அண்மைக்காலமாக பெண்களுக்குப் பாதுகாப்பற்ற சூழல் நிலவி வருவதாகவும், பெண்களுக்கு எதிரான குற்றங்கள் பெருகி வருவதாகவும் கூறினாா். அதற்கு உதாரணமாக பொள்ளாச்சி, நாகா்கோவில் உள்ளிட்ட பல்வேறு பகுதிகளில் நடைபெற்ற சம்பவங்களை சுட்டிக்காட்டினாா்.

திமுக ஆட்சிக் காலத்தில் பெண்களுக்கு சமுதாயத்தில் உரிய அங்கீகாரம் வழங்கிடும் வகையில் ஏற்படுத்தப்பட்ட மகளிா் சுயஉதவிக் குழுக்கள், தற்போதைய ஆட்சியாளா்களால் புறக்கணிக்கப்படுவதாகக் குற்றம் சாட்டிய அவா், திமுக ஆட்சிக்கு வந்தால், மகளிருக்கு உரிய பயிற்சிகள், கடன் உதவிகள் அதிக அளவில் வழங்கப்படும் என்று உறுதி அளித்தாா்.

இந்த நிகழ்ச்சியில் திமுக மாவட்டச் செயலாளா்கள் டி.எம்.செல்வகணபதி, எஸ்.ஆா்.சிவலிங்கம், மக்களவை உறுப்பினா் எஸ்.ஆா்.பாா்த்திபன், மாநிலப் பொதுக்குழு உறுப்பினா்கள் சுப்பிரமணி, பி.ஏ.முருகேசன், மாவட்டத் துணைச் செயலாளா் சம்பத்குமாா், ஒன்றியச் செயலாளா் பரமசிவம் உள்ளிட்ட கட்சி நிா்வாகிகள் கலந்துகொண்டனா்.