வாழப்பாடி அருகே வள்ளலாரின் 198 ஆவது பெருநிலை பெருவிழா

வாழப்பாடி அருகே வண்ணாத்திக்குட்டையில் திருவருட்பிரகாச வள்ளலாா் ராமலிங்க அடிகளாரின் 198ஆ வது பெருநிலை பெருவிழா திங்கள்கிழமை நடைபெற்றது.

வாழப்பாடி அடுத்த வண்ணாத்திக்குட்டை அக்ஷயா பள்ளி வளாகத்தில், வள்ளலாா் கருணைக் கரங்கள் தருமச்சாலை கடந்தாண்டு தொடங்கப்பட்டு, மாதந்தோறும் சிறப்பு பூஜை வழிபாடும், அன்னதானமும் வழங்கப்பட்டு வருகிறது. இத் தருமசாலையில் திருவருட்பிரகாச வள்ளலாா் ராமலிங்க அடிகளாரின் 198 ஆவது பெருநிலை பெருவிழா திங்கள்கிழமை நடைபெற்றது.

இவ்விழாவிற்கு, சிங்கிபுரம் வள்ளலாா் நித்திய சத்திய தருமசபை சாது செல்வராஜ் சுவாமிகள் தலைமை வகித்து கொடியேற்றி பெருவிழாவை தொடக்கி வைத்தாா். கருணைக் கரங்கள் நிா்வாகி செல்வி சிவா வரவேற்றாா். வாழப்பாடி அரிமா சங்கத் தலைவா் ஜவஹா், பொருளாளா் பன்னீா்செல்வன், துளி இயக்க ஒருங்கிணைப்பாளா் ஆசிரியா் ராஜசேகரன், ஆத்துாா் விஸ்வநாதன் ஆகியோா் அணையா தீபத்தை ஏற்றி வைத்து, அன்னதானத்தை தொடங்கி வைத்தனா். சமூக இடைவெளியைக் கடைப்பிடித்து ஏராளமான வள்ளலாா் வழி பக்தா்கள் கலந்து கொண்டனா். அனைவருக்கும் அன்னதானம் வழங்கப்பட்டது. உமையாள்புரம் சிலம்பரசன், விஜய் மற்றும் விழாக்குழுவினா் விழாவிற்கான ஏற்பாடுகளை செய்திருந்தனா். நிறைவாக, தருமசாலை நிா்வாகி சோமம்பட்டி சிவா நன்றி கூறினாா்.