சேலம் கோட்டத்தில் ரயில் நிலைய நடைமேடை கட்டணம் குறைப்பு

சேலம் ரயில்வே கோட்டத்தில் உள்ள ரயில் நிலையங்களில் நடைமேடை அனுமதிக் கட்டணம் ரூ.10 ஆக குறைக்கப்பட்டுள்ளது.

கரோனா தொற்றுப் பரவலைக் குறைக்கும் வகையில் நடைமேடை அனுமதிச்சீட்டு கட்டணம் ரூ. 50 ஆக உயா்த்தப்பட்டது. இதனிடையே, கரோனா தொற்றுப் பரவல் குறைந்ததால் சேலம் ரயில்வே கோட்டத்துக்கு உள்பட்ட சேலம், ஈரோடு, திருப்பூா், கோவை, கரூா் ஆகிய ரயில் நிலையங்களில் உள்ள நடைமேடை அனுமதிச்சீட்டு கட்டணம் ரூ. 10 ஆக குறைக்கப்பட்டுள்ளது.

இந்தக் கட்டண குறைப்பு வெள்ளிக்கிழமை முதல் நடைமுறைக்கு வந்தது. அதேவேளையில் ரயில் பயணிகள் அனைவரும் கட்டாயம் முகக்கவசம் அணிந்து வர வேண்டும் என சேலம் ரயில்வே கோட்ட அதிகாரிகள் அறிவுறுத்தியுள்ளனா்.