தேனி, ஜன. 8:தேனி மாவட்ட விளையாட்டு அரங்கம், ராயப்பன்பட்டி எஸ்.யு.எம். மேல்நிலைப் பள்ளி ஆகிய இடங்களில் விளையாட்டு மேம்பாட்டு ஆணையம் சார்பில் மாவட்ட அளவில் ஊராட்சி ஒன்றியங்களுக்கு இடையிலான விளையாட்டுப் போட்டிகள் திங்கள்கிழமை(ஜன.10) தொடங்குகிறது.

இதுகுறித்து மாவட்ட நிர்வாகம் வெளியிட்டுள்ள செய்திக் குறிப்பு:ஜனவரி 10 மற்றும் 11-ம் தேதிகளில் காலை 8 மணிக்கு மாவட்ட விளையாட்டுப் போட்டிகள் நடைபெறுகின்றன. இந்தப் போட்டிகளில், ஊராட்சி ஒன்றிய அளவில் நடைபெற்ற குழு விளையாட்டுப் போட்டிகளில் முதலிடம் பெற்றவர்களும், தடகளப் போட்டிகளில் முதல் இரண்டு இடங்களில் வெற்றி பெற்றவர்களும் கலந்து கொள்ளலாம்.

தேனி மாவட்ட விளையாட்டு அரங்கில் ஜனவரி 10-ம் தேதி தடகளப் போட்டிகளும், 11-ம் தேதி கூடைப்பந்து, கால்பந்து மற்றும் கைப்பந்து போட்டிகளும் நடைபெறும். ராயப்பன்பட்டி எஸ்.யு.எம். மேல்நிலைப் பள்ளி மைதானத்தில் ஜனவரி 10-ம் தேதி ஹாக்கி போட்டி நடைபெறும்.

இந்தப் போட்டிகளில் தேர்வு செய்யப்படும் வீரர்கள், மாநில அளவிலான போட்டியில் கலந்து கொள்வதற்கு அரசு செலவில் அழைத்துச் செல்லப்படுவர் என்று தெரிவிக்கப்பட்டுள்ளது.