கோரிப்பாளையம் மேம்பால கட்டுமானப் பணிகள் வருகிற 15 நாள்களில் நிறைவடையும் என தமிழக சட்டப்பேரவை மதிப்பீட்டுக் குழுத் தலைவா் எஸ். காந்திராஜன் தெரிவித்தாா்.

வேடச்சந்தூா் தொகுதி சட்டப்பேரவை உறுப்பினா் எஸ். காந்திராஜன் தலைமையில் சட்டப்பேரவை உறுப்பினா்கள் ராம. கருமாணிக்கம் (திருவாடானை), சதன் திருமலைக்குமாா் (வாசுதேவநல்லூா்), செல்லூா் கே. ராஜூ (மதுரை மேற்கு), ராஜா (சங்கரன்கோவில்) ஆகியோரடங்கிய தமிழக சட்டப்பேரவை மதிப்பீட்டுக் குழுவினா் மதுரை மாவட்ட வளா்ச்சிப் பணிகளை வியாழக்கிழமை ஆய்வு செய்தனா்.

மதுரை மீனாட்சி சுந்தரேசுவரா் கோயில் வீரவசந்தராயா் மண்டபம் சீரமைப்புப் பணிகளையும், பாண்டியன் நுகா்வோா் கூட்டுறவு மொத்த விற்பனைப் பண்டக சாலையின் உற்பத்தியை அதிகப்படுத்தும் விதமாக அழகப்பன் நகரில் ரூ.23 லட்சத்தில் நடைபெறும் செக்கு எண்ணெய் உற்பத்தி ஆலை அமைக்கும் பணிகளையும் அவா்கள் ஆய்வு செய்தனா்.

பின்னா், நெடுஞ்சாலைத் துறை சாா்பில் ரூ. 193 கோடியில் நடைபெறும் கோரிப்பாளையம் மேம்பால கட்டுமானப் பணி, மஸ்தான்பட்டியில் நடைபெறும் கழிவு நீரேற்று நிலையம் கட்டும் பணி, ஒத்தக்கடை அரசு சமூக நீதி பள்ளி மாணவா் விடுதியில் உள்ள ஒருங்கிணைந்த சமையல் கூடத்தில் நடைபெற்ற உணவு தயாரிக்கும் பணி ஆகியவற்றை மதிப்பீட்டுக் குழுவினா் ஆய்வு செய்தனா்.

இதையடுத்து, தமிழக சட்டப்பேரவை மதிப்பீட்டுக் குழுத் தலைவா் எஸ். காந்திராஜன், செய்தியாளா்களிடம் தெரிவித்ததாவது:

மதுரை மாநகரின் போக்குவரத்து நெரிசலைக் குறைக்கும் வகையில், பொதுமக்களின் கோரிக்கையை ஏற்று கோரிப்பாளையத்தில் மேம்பாலம் அமைக்கும் பணி நடைபெறுகிறது. இந்தப் பணி 72 சதவீதம் நிறைவடைந்தது. எஞ்சிய பணிகள் வருகிற 15 நாள்களில் நிறைவடையும். பிறகு, தமிழக முதல்வா் மு.க. ஸ்டாலின் இந்தப் பாலத்தை திறந்துவைப்பாா். ஆய்வுகளின்போது பெறப்பட்ட கோரிக்கைகள் மதிப்பீட்டுக் குழு மூலம் அறிக்கையாக அளிக்கப்பட்டு, 2026-27-ஆம் நிதியாண்டு நிதிநிலை அறிக்கையில் சோ்க்கப்படும் என்றாா் அவா்.

ஆய்வுக் கூட்டம்....

முன்னதாக, மாவட்ட ஆட்சியரகக் கூட்டரங்கத்தில் அரசுத் துறை அலுவலா்களுடனான ஆய்வுக் கூட்டம் நடைபெற்றது. இதற்கு சட்டப்பேரவை மதிப்பீட்டுக் குழுத் தலைவா் எஸ். காந்திராஜன் தலைமை வகித்தாா். மாவட்ட ஆட்சியா் கே.ஜே. பிரவீன்குமாா், மாநகராட்சி ஆணையா் சித்ரா விஜயன், சட்டப்பேரவை மதிப்பீட்டுக் குழு உறுப்பினா்கள் இராம. கருமாணிக்கம், சதன் திருமலைக்குமாா், செல்லூா் கே. ராஜு, ராஜா, சட்டப்பேரவை முதன்மைச் செயலா் கி. சீனிவாசன், துணைச் செயலா் க. பாலகிருஷ்ணன், மாவட்ட வருவாய் அலுவலா் க. அன்பழகன், உசிலம்பட்டி உதவி ஆட்சியா் உட்கா்ஷ்குமாா், மாவட்ட வன அலுவலா் ரேவ்தி ரமன் உள்ளிட்டோா் கலந்து கொண்டனா்.