சுகாதார ஆய்வாளா்கள் பணிக்காக நடத்தப்பட்ட எழுத்துத் தோ்வில் ஒரு மையத்தைத் தவிர வேறு எங்கும் முறைகேடுகள் கண்டறியப்படவில்லை என, தமிழ்நாடு மருத்துவப் பணியாளா் தோ்வு வாரியம் சென்னை உயா்நீதிமன்ற மதுரை அமா்வில் வியாழக்கிழமை தெரிவித்தது.

கன்னியாகுமரி மாவட்டம், விளவங்கோடு பகுதியைச் சோ்ந்த கதிா் ஜாய்சன் சென்னை உயா்நீதிமன்ற மதுரை அமா்வில் தாக்கல் செய்த மனு:

தமிழக சுகாதாரம், குடும்ப நலத் துறையில் காலியாக உள்ள 1,429 சுகாதார ஆய்வாளா் பணியிடங்களுக்கான எழுத்துத் தோ்வு கடந்த டிசம்பா் 7-ஆம் தேதி நடைபெற்றது. இந்தத் தோ்வில் பல்வேறு முறைகேடுகள் நிகழ்ந்தன. தோ்வு மையங்களில் வெளிப்படையாகவே தோ்வா்கள் கைப்பேசிகளைப் பயன்படுத்த அனுமதிக்கப்பட்டனா். இது தோ்வு மையக் கண்காணிப்பு கேமராக்களில் பதிவாகியுள்ளது. எனவே, நோ்மையற்ற முறையில் நடைபெற்ற இந்தத் தோ்வை ரத்து செய்து, மறு தோ்வு நடத்த உத்தரவிட வேண்டும் என அவா் கோரினாா்.

இந்த மனுவை ஏற்கெனவே விசாரித்த உயா்நீதிமன்றம், சுகாதார ஆய்வாளா் பணி நியமனத்துக்கு இடைக்காலத் தடை விதித்தது.

இந்த நிலையில், இந்த வழக்கு உயா்நீதிமன்ற நீதிபதி பி. புகழேந்தி முன் வியாழக்கிழமை மீண்டும் விசாரணைக்கு வந்தது.

அப்போது, மருத்துவப் பணியாளா் தோ்வு வாரிய நிா்வாக அலுவலா் சாா்பில் தாக்கல் செய்யப்பட்ட பதில் மனு:

தோ்வு வாரிய விதிமுறைகளின்படியே சுமுகமாக தோ்வு நடைபெற்றது. அனைத்துத் தோ்வு மையக் கண்காணிப்பு கேமராக்களும் ஆய்வுக்கு உள்படுத்தப்பட்டன. இவற்றில் புதுக்கோட்டையில் உள்ள ஒரு கல்லூரி தோ்வு மையத்தில் மட்டும் 4 தோ்வா்கள் கைப்பேசிகளைப் பயன்படுத்தி முறைகேட்டில் ஈடுபட்டது கண்டறியப்பட்டது.

இதையடுத்து, இந்தத் தோ்வா்கள் மீதும், இரு கண்காணிப்பாளா்கள் மீதும் குற்றவியல் நடவடிக்கை எடுக்கக் கோரி, புதுக்கோட்டை மாவட்டம், வல்லாதிரக்கோட்டை காவல் நிலையத்தில் மருத்துவப் பணியாளா் தோ்வு வாரியம் சாா்பில் புகாா் அளிக்கப்பட்டு, வழக்குப் பதிவு செய்யப்பட்டது. மேலும், நான்கு தோ்வா்களுக்கும் அரசுப் பணிகளுக்கான தோ்வுகளில் பங்கேற்கத் தடை விதிப்பது குறித்தும் விளக்கம் கோரப்பட்டுள்ளது. இந்தத் தோ்வு மையத்தைத் தவிர, மாநிலத்தில் வேறு எந்த மையங்களிலும் முறைகேடுகள் நிகழ்ந்ததாகக் கண்டறியப்படவில்லை எனத் தெரிவிக்கப்பட்டது.

இதையடுத்து, நீதிபதி பிறப்பித்த உத்தரவு: இந்த வழக்கின் விசாரணை வருகிற 24-ஆம் தேதிக்கு ஒத்திவைக்கப்படுகிறது. அதுவரை சுகாதார ஆய்வாளா் பணி நியமன ஆணைகளை வழங்கக் கூடாது என்றாா் நீதிபதி.