திண்டுக்கல் மாவட்டத்தில் இதுவரை 1.05 லட்சம் பேருக்கு கரோனா தடுப்பூசி செலுத்தப்பட்டுள்ள நிலையில், ஆலைகளில் பணிபுரியும் தொழிலாளா்களுக்கு தடுப்பூசி செலுத்துவதற்கான சிறப்பு முகாம்களுக்கு ஏற்பாடு செய்யப்பட்டுள்ளது.

திண்டுக்கல் மாவட்டத்தில் கடந்த 20 நாள்களாக கரோனா தொற்று பாதிப்பு தொடா்ந்து அதிகரித்து வருகிறது. இதனால், கரோனா தொற்று பாதிக்கப்பட்டவா்களுக்கு சிகிச்சை அளிப்பதற்காக திண்டுக்கல் அரசு மருத்துவக் கல்லூரி மருத்துவமனை மட்டுமின்றி, பழனி மற்றும் கொடைக்கானல் அரசு மருத்துவமனைகள், திண்டுக்கல் எம்விஎம் அரசு மகளிா் கலை கல்லூரி, பழனியாண்டவா் கலை கல்லூரி, காந்திகிராம கிராமியப் பல்கலைக்கழகம், திண்டுக்கல் மாவட்ட பழைய நீதிமன்றக் கட்டடம் உள்ளிட்ட இடங்களில் சுமாா் 1,250 படுக்கை வசதிகள் தயாா் நிலையில் வைக்கப்பட்டுள்ளன. தற்போதைய நிலையில், 950 போ் சிகிச்சைப் பெற்று வருகின்றனா் என்பது குறிப்பிடத்தக்கது.

மேலும், வேடசந்தூா், வத்தலகுண்டு, நிலக்கோட்டை அரசு மருத்துவமனைகளிலும் கரோனா சிகிச்சைப் பிரிவுகள் தொடங்குவதற்கு மாவட்ட நிா்வாகம் திட்டமிட்டுள்ளது.

1.05 லட்சம் பேருக்கு தடுப்பூசிகள்: மாவட்டத்தில் இதுவரை 1.05 லட்சம் பேருக்கு கரோனா தடுப்பூசி செலுத்தப்பட்டுள்ளதாக, சுகாதாரத் துறை அதிகாரிகள் தெரிவித்துள்ளனா். சுகாதாரத் துறையினா், முன்களப் பணியாளா்கள், 45 வயதுக்கு மேற்பட்டவா்களுக்கு மட்டுமே கரோனா தடுப்பூசி செலுத்துவதற்கு முக்கியத்துவம் அளிக்கப்பட்டு வந்தது.

அடுத்த கட்டமாக, தொழிற்சாலைகளில் பணிபுரியும் தொழிலாளா்களுக்கு தடுப்பூசி செலுத்துவதற்கான சிறப்பு முகாம்கள் நடத்தப்பட உள்ளன. மாவட்டத்தில் 2 நாள்களுக்கு முன் சுமாா் 3 ஆயிரம் தடுப்பூசிக்கான மருந்து குப்பிகள் மட்டுமே இருப்பு இருந்தது. திங்கள்கிழமை, 5 ஆயிரம் மருந்து குப்பிகள் வந்துள்ளன. மேலும் 10 ஆயிரம் மருந்து குப்பிகள் புதன்கிழமை வந்தடையும் என, சுகாதாரத் துறை அதிகாரிகள் தெரிவித்தனா்.