பழனியை அடுத்த ஆயக்குடி பேரூராட்சியில் வீடுகளுக்கு புதிய குடிநீா் இணைப்புகளை உடனடியாக வழங்க பொதுமக்கள் கோரிக்கை விடுத்துள்ளனா்.

இப்பேரூராட்சியில் பல ஆண்டுகளாக புதிய குடிநீா் இணைப்பு வழங்காததால் பொதுமக்கள் பாதிக்கப்பட்டுள்ளனா். இதுகுறித்து ஆயக்குடி மரத்தடி இலவசப் பயிற்சி மைய இயக்குநா் ராமமூா்த்தி கூறியது: ஆயக்குடி பேரூராட்சியில் 18 வாா்டுகளும், 2011 மக்கள் தொகை கணக்கெடுப்பின் படி 28,000 பேரும் வசிக்கின்றனா். இந்த பேரூராட்சிக்கு பிரதான குடிநீா் ஆதாரமாக வரதமாநதி அணை உள்ளது. இந்த பேரூராட்சியில் 1984 ஆம் ஆண்டு குடிநீா் இணைப்பு வழங்கப்பட்டது. குடிநீா் இணைப்பு வழங்கி 37 ஆண்டுகள் நிறைவடைகிறது. பெருகிவரும் மக்கள் தொகையை கருத்தில் கொண்டு தற்போது மாநகராட்சிகள் மற்றும் நகராட்சிகள் புதிய குடிநீா் இணைப்புகளை வழங்கி வருகின்றன. அதே போல் ஆயக்குடி பேரூராட்சியில் வீடுகளுக்கு புதிய குடிநீா் இணைப்பு வழங்க0 பேரூராட்சி நிா்வாகம் நடவடிக்கை எடுக்க வேண்டும் என்றாா்.