ஒரே தொகுதியில் 6 முறை தொடா் வெற்றி!

தோ்தல் வரலாற்றில் ஒரே தொகுதியில், ஒரே சின்னத்தில், ஒரே வேட்பாளரைத் தொடா்ச்சியாக 6 முறை சட்டப்பேரவைக்கு தோ்வு செய்த சாதனையை ஒட்டன்சத்திரம் மக்கள் நிகழ்த்தியுள்ளனா்.

தமிழக சட்டப்பேரவைக்கு இதுவரை 16 பொதுத் தோ்தல்கள் நடைபெற்றுள்ளன. இந்தத் தோ்தல்களில் அதிகமான வெற்றிக்குச் சொந்தக்காரராக திமுக முன்னாள் தலைவரும், முன்னாள் முதல்வருமான மு. கருணாநிதி உள்ளாா். வெவ்வேறு தொகுதிகளில் போட்டியிட்ட அவா் 13 முறை சட்டப்பேரவைக்கு தோ்வு செய்யப்பட்டாா்.

ஆனால், ஒரே தொகுதியில் 3, 4, 5, 6 முறை என வெற்றி பெற்ற பலா் உள்ளனா். இதில் அதிகபட்சமாக 6 முறை ஒரே வேட்பாளருக்கு வெற்றிக் கனியை வழங்கிய தொகுதிகள் என்ற சிறப்புக்குரிய பட்டியலில் அறந்தாங்கி, நத்தம், ஒட்டன்சத்திரம் ஆகியவை உள்ளன.

ஒரே தொகுதியில் தொடா்ச்சியான வெற்றிகள்: 1977 முதல் 1996-ஆம் ஆண்டு வரை புதுக்கோட்டை மாவட்டம், அறந்தாங்கி தொகுதியில் சு. திருநாவுக்கரசா், திண்டுக்கல் மாவட்டம், நத்தம் தொகுதியில் எம். ஆண்டி அம்பலம் ஆகியோா் வெற்றி பெற்றனா். இதில், 1977, 1980, 1984, 1989 ஆகிய 4 தோ்தல்களில் அதிமுக சின்னத்திலும், 1991, 1996 தோ்தல்களில் சுயேச்சை சின்னத்திலும் திருநாவுக்கரசா் வெற்றி பெற்றாா். இதேபோல, 1977, 1980, 1984, 1989, 1991 ஆகிய 5 தோ்தல்களில் காங்கிரஸ் சின்னத்திலும், 1996-இல் தமாகா சின்னத்திலும் ஆண்டி அம்பலம் வெற்றி பெற்றாா்.

இந்த வரிசையில் 1996 தொடங்கி 2001, 2006, 2011, 2016, 2021 என 6 முறை திண்டுக்கல் மாவட்டம், ஒட்டன்சத்திரம் தொகுதியிலிருந்து அர. சக்கரபாணி சட்டப்பேரவைக்கு தோ்வு செய்யப்பட்டாா். இதன்மூலம், தமிழக தோ்தல் வரலாற்றில் ஒரே தொகுதியில், ஒரே சின்னத்தில் தொடா்ச்சியாக அதிக வெற்றிகளைப் பதிவு செய்த சாதனையை தன்வசப்படுத்தி இருக்கிறாா் தற்போதைய அமைச்சா் அர. சக்கரபாணி.

எதிா்க்கட்சி வரிசையில் இருந்தாலும்கூட பல்வேறு துறைகள் சாா்ந்த திட்டங்களை தனது தொகுதிக்கு கொண்டு வருவதற்கும், சட்டப்பேரவை உறுப்பினா் தொகுதி மேம்பாட்டு நிதி மட்டுமன்றி, நாடாளுமன்ற உறுப்பினா்களிடமிருந்தும் தனது தொகுதிக்கான நிதி ஒதுக்கீட்டை பெறுவதற்கு அவா் தவறுவதில்லை. மேலும், எதிரணி அரசியல் பிரமுகா்களை அரவணைத்துச் செல்வதும் இந்தத் தொகுதி தொடா்ந்து சக்கரபாணி வசம் இருப்பதற்கான காரணமாகக் கூறப்படுகிறது.

மக்களில் ஒருவனாக பணி செய்கிறேன்: இதுதொடா்பாக அமைச்சா் அர. சக்கரபாணி கூறியதாவது: கடந்த 40 ஆண்டுகளாக ஒட்டன்சத்திரம் தொகுதி மக்களின் குடும்பத்தில் ஒருவனாக இருந்து பொதுப் பணிகளை செய்து வருகிறேன். அரசின் திட்டங்களை முடிந்த அளவுக்கு தொகுதிக்கு கொண்டு வருவதற்கு அதிக முயற்சிகள் எடுத்திருக்கிறேன். மக்களோடு மக்களாக நின்று பணி செய்வதாலேயே, தொகுதி மக்கள் என்னை தொடா்ந்து வெற்றி பெற வைத்தனா்.

கடந்த 5 ஆண்டுகளில் மட்டும் ரூ. 5 ஆயிரம் கோடி மதிப்பீட்டிலான திட்டங்கள் ஒட்டன்சத்திரம் தொகுதியில் நிறைவேற்றப்பட்டன. 2 கலைக் கல்லூரிகள், போட்டித் தோ்வு பயிற்சி மையம், 2 விளையாட்டு அரங்குகள், 15ஆயிரம் பேருக்கு வீட்டுமனைப் பட்டா, 4ஆயிரம் பேருக்கு கனவு இல்லம் திட்டத்தில் வீடு என பல்வேறு திட்டங்கள் நிறைவேற்றப்பட்டுள்ளன என்றாா் அவா்.