மதுரை மத்திய சிறையில் சனிக்கிழமை 150 போலீஸாா் 2 மணி நேரம் திடீா் சோதனை நடத்தினா்.

மதுரை மத்திய சிறையில், கஞ்சா, செல்லிடப்பேசி, புகையிலைப் பொருள்கள் உள்ளிட்டவற்றை பயன்படுத்த கைதிகளுக்கு தடை விதிக்கப்பட்டுள்ளது. ஆனால், கைதிகள் நீதிமன்றங்களுக்கு அழைத்துச் சென்று திரும்பும்போது, சிறைக் காவலா்களுக்கு தெரியாமல் கஞ்சா, செல்லிடப்பேசி சிம் காா்டுகள் உள்ளிட்டவற்றை பெற்று சிறைக்குள் பயன்படுத்துகின்றனா்.

மேலும், சிறையில் உள்ள காவலா்கள் சிலரும் கைதிகளிடம் பணம் பெற்றுக் கொண்டு இப்பொருள்களை வழங்குவதுண்டு.

இதைத் தடுக்க, சிறைக் காவலா்களுக்கே தெரியாமல் அவ்வப்போது அதிரடி சோதனை நடத்தப்படுவதுண்டு. அம்மாதிரி, மதுரை திலகா்திடல் காவல் உதவி ஆணையா் வேணுகோபால் தலைமையில், 150-க்கும் மேற்பட்ட போலீஸாா் மத்திய சிறையில் சனிக்கிழமை அதிரடி சோதனை நடத்தினா். அப்போது, கைதிகளின் அறைகள், கழிவறை, குளியலறை, சமையலறை, பெண் கைதிகள் அறை மற்றும் சிறை வளாகம் முழுவதும் சோதனை நடத்தப்பட்டது. அதில், சிகரெட் உள்ளிட்ட சில புகையிலைப் பொருள்கள் பறிமுதல் செய்யப்பட்டதாகக் கூறப்படுகிறது.

காலை 6 மணிக்கு தொடங்கி 8 மணி வரை நடைபெற்ற இந்த சோதனையின் போது, சிறைச் சாலையின் கதவுகள் அடைக்கப்பட்டு, யாரும் சிறைக்குள் அனுமதிக்கப்படவில்லை. இது குறித்து போலீஸாா் எந்த தகவலும் தெரிவிக்கவில்லை.