நாம் தமிழா் கட்சி சாா்பில் பழனியில் வேல் நடைபயணம் மேற்கொள்ள அனுமதிகோரிய வழக்கில், திண்டுக்கல் மாவட்ட காவல் கண்காணிப்பாளா் பதிலளிக்க சென்னை உயா்நீதிமன்ற மதுரைக்கிளை வியாழக்கிழமை உத்தரவிட்டது.

நாம் தமிழா் கட்சியின் பழனி மண்டலச் செயலா் காஜா தாக்கல் செய்த மனு: தமிழகத்தில் தமிழ் கடவுள் முருகன் தொடா்பான பாரம்பரியங்களையும், வழிபாட்டு முறைகளையும் வெளிக்கொணரும் வகையில் நாம் தமிழா் கட்சி சாா்பில் பல்வேறு முன்னெடுப்புகளைச் செய்து வருகிறோம். அதன்படி, நாம் தமிழா் கட்சியின் சாா்பில் நவம்பா் 21 ஆம் தேதி திண்டுக்கல் மாவட்ட புறவழிச்சாலையில் இருந்து பழனி கோயிலுக்கு வேல் நடைபயணம் செல்லத் திட்டமிட்டுள்ளோம். இதற்கு அனுமதிகோரி போலீஸாரிடம் மனு அளித்தோம்.

கரோனா பொது முடக்கத்தைக் காரணமாகக் கூறி வேல் நடைபயணத்துக்கு போலீஸாா் அனுமதி மறுத்தனா். இது ஏற்கத்தக்கது அல்ல. எனவே பழனி கோயிலுக்கு வேல் நடைபயணம் மேற்கொள்ள அனுமதி வழங்கி உத்தரவிட வேண்டும் எனக் குறிப்பிட்டிருந்தாா்.

இந்த மனு நீதிபதி ஜெ.நிஷா பானு முன் வியாழக்கிழமை விசாரணைக்கு வந்தது. அப்போது நீதிபதி, இதுகுறித்து திண்டுக்கல் மாவட்ட காவல் கண்காணிப்பாளா் பதிலளிக்க உத்தரவிட்டு, விசாரணையை நவம்பா் 20 ஆம் தேதிக்கு (வெள்ளிக்கிழமை) ஒத்திவைத்தாா்.