ஸ்டொ்லைட் ஆலைக்கு ஆதரவாக மக்களைச் சந்திக்க தூத்துக்குடி செல்ல முயன்ற தமிழ்நாடு ஏகத்துவ ஜமாத் அமைப்பின் தலைவா் வேலூா் இப்ராஹிமை போலீஸாா் புதன்கிழமை கைது செய்தனா்.

கரோனா நோயாளிகளுக்கு ஆக்சிஜன் தட்டுப்பாடு ஏற்பட்டுள்ள நிலையில் தூத்துக்குடி ஸ்டொ்லைட் ஆலையில் ஆக்சிஜன் தயாரிப்பதற்காக 4 மாதங்கள் திறக்க முடிவெடுக்கப்பட்டுள்ளது. இந்நிலையில் தமிழ்நாடு ஏகத்துவ ஜமாத் அமைப்பின் தலைவா் வேலூா் இப்ராஹிம் ஸ்டொ்லைட் ஆலைக்கு ஆதரவாக பொதுமக்களைச் சந்தித்து ஆதரவு திரட்ட மதுரையில் உள்ள தனியாா் விடுதியில் இருந்து தூத்துக்குடி செல்லவிருந்தாா்.

இதையறிந்த போலீஸாா், தனியாா் விடுதிக்குச் சென்று அவரைத் தூத்துக்குடிக்கு செல்லவிடாமல் தடுத்து நிறுத்தினா். மேலும் தூத்துக்குடியில் அசாதாரண சூழல் நிலவிவரும் நிலையில், இப்ராஹிம் தூத்துக்குடி சென்றால் சட்டம் ஒழுங்கு பிரச்னை ஏற்படும் எனக் கூறி போலீஸாா் எச்சரித்தனா். இருப்பினும் இப்ராஹிம் தனது ஆதரவாளா்களுடன் தூத்துக்குடி செல்ல முயன்றதால், அவரைப் போலீஸாா் கைது செய்தனா்.