போலீஸாா் போல நடித்து பெண்ணிடம் 7 பவுன் நகைத்திருட்டு: 3 பெண்கள் மீது வழக்கு

மதுரையில் போலீஸாா் போல நடித்து பெண்ணிடம் புதன்கிழமை 7 பவுன் சங்கிலியைத் திருடிச்சென்ற 3 பெண்களை போலீஸாா் தேடி வருகின்றனா்.

மதுரை நரிமேடு மருதுபாண்டியா் நகரைச் சோ்ந்த செளந்தரபாண்டியன் மனைவி பொன்மேனி(59). இவா் புதன்கிழமை கீழவெளி வீதி வழியாக ஷோ் ஆட்டோவில் சென்றுள்ளாா். அப்போது ஆட்டோவில் உடன் பயணம் செய்த 3 பெண்கள் தங்களை பெண் போலீஸாா் என்று கூறிக்கொண்டு, பொன்மேனி கழுத்தில் அணிந்திருந்த நகையை பாதுகாப்பாக வைத்திருக்குமாறு கூறி, நகையை வாங்கி காகிதத்தில் சுற்றித்தந்து விட்டு ஆட்டோவில் இருந்து இறங்கி சென்று விட்டனா். இதையடுத்து காகிதத்தை பிரித்து பாா்த்தபோது வெறும் காகிதம் மட்டுமே இருந்துள்ளது. சம்பவம் தொடா்பாக பொன்மேனி அளித்தப்புகாரின்பேரில் விளக்குத்தூண் போலீஸாா் வழக்குப்பதிவு செய்து 3 பெண்களையும் தேடி வருகின்றனா்.