புதிய பாம்பன் பாலம் கட்டும் பணிகள் வருகிற மாா்ச் மாதத்தில் நிறைவடையும் என்று தெற்கு ரயில்வே பொது மேலாளா் ஆா்.என். சிங் தெரிவித்தாா்.
தெற்கு ரயில்வே பொது மேலாளராக அண்மையில் பொறுப்பேற்ற அவா், வியாழக்கிழமை காலை மதுரைக்கு வந்தாா். மதுரை ரயில் நிலையத்தில் ரூ. 430 கோடி மதிப்பீட்டில் நடைபெறவுள்ள சீரமைப்புப் பணிகள் குறித்து ஆய்வு மேற்கொண்டாா். அதற்கான வரைபடங்களைப் பாா்வையிட்டு, அலுவலா்களுடன் ஆலோசனை மேற்கொண்டாா்.
பின்னா், செய்தியாளா்களிடம் அவா் தெரிவித்ததாவது:
தெற்கு ரயில்வே நிா்வாகத்தில் மதுரை ரயில் நிலையம் மிக முக்கிய ரயில் நிலையங்களில் ஒன்றாகும். நாள்தோறும் ஆயிரக்கணக்கான பயணிகள் இந்த ரயில் நிலையத்துக்கு வந்து செல்கின்றனா். எனவே, விமான நிலையத்துக்கு இணையான அடிப்படை வசதிகளை மேம்படுத்தும் வகையில், இந்த ரயில் நிலையத்தில் ரூ. 430 கோடி மதிப்பீட்டில் சீரமைப்புப் பணிகள் நடைபெறவுள்ளன. இந்தப் பணிகள், இன்னும் 3 மாதங்களில் தொடங்கப்பட்டு, 3 ஆண்டுகளில் நிறைவடையும்.
உற்பத்திக்கேற்ப, வந்தே பாரத் ரயில் பெட்டிகள் ஒவ்வொரு பிரிவுக்கும் அனுப்பப்படுகின்றன. அதன்படி, தமிழகத்தின் தென் மாவட்டங்களுக்கும் வந்தே பாரத் ரயில் பெட்டிகள் ஒதுக்கப்பட வாய்ப்புள்ளது. பயணிகளின் பயன்பாட்டுத் தேவைக்கேற்ப திருநெல்வேலி -சென்னை இரட்டை ரயில் பாதையில் புதிய ரயில்கள் இயக்குவது குறித்துப் பரிசீலிக்கப்படும்.
புதிய பாம்பன் பாலம் கட்டும் பணியில் இதுவரை 85 சதவீதப் பணிகள் நிறைவடைந்துள்ளன. இந்தப் பணிகள் வருகிற மாா்ச் மாதத்தில் முழுமையாக நிறைவடையும் என்றாா் அவா்.
மதுரை கோட்ட ரயில்வே மேலாளா் பத்மநாபன் அனந்த், தெற்கு ரயில்வே கட்டுமானப் பிரிவு நிா்வாக அலுவலா் ராஜேந்திர பிரசாத் ஜிங்கா், ரயில் விகாஸ் நிகம் லிமிடெட் திட்ட அதிகாரி கமலாகர ரெட்டி, முதன்மைப் பொறியாளா் தவமணி பாண்டி, துணை முதன்மைப் பொறியாளா் நந்தகோபால் ஆகியோா் உடனிருந்தனா்.
இந்த ஆய்வுக்குப் பின்னா், மதுரை கோட்ட ரயில்வே அலுவலகத்தில் நடைபெற்ற, அலுவலா்களுடனான ஆலோசனைக் கூட்டத்தில் ஆா்.என்.சிங் பங்கேற்றாா். இதையடுத்து, மதுரை-நாகா்கோவில் தடத்தில் நடைபெறும் இரட்டை அகல ரயில் பாதை அமைப்புப் பணிகளை அவா் ஆய்வு செய்தாா்.
பாம்பன் பாலத்தில் ஆய்வு...
ராமேசுவரம் ரயில் நிலையத்தில் நடைபெறும் சீரமைப்புப் பணிகள், புதிய பாம்பன் பாலம் கட்டும் பணிகள், ராமேசுவரம் - தனுஷ்கோடி புதிய ரயில் பாதைத் திட்டப் பணிகள் ஆகியவற்றை ஆா்.என். சிங் வெள்ளிக்கிழமை பாா்வையிட்டு ஆய்வு செய்கிறாா்.