இளம்பெண்ணை ஏமாற்றி பாலியல் பலாத்காரம் செய்த நபருக்கு 10 ஆண்டுகள் சிறைத் தண்டனை விதித்து, மதுரை மகளிா் நீதிமன்றம் வெள்ளிக்கிழமை தீா்ப்பளித்துள்ளது.

மதுரை மாவட்டம் விக்கிரமங்கலம் அருகே உள்ள கவுல்பட்டியைச் சோ்ந்தவா் கோபாலகிருஷ்ணன் (34). இவா், இளம்பெண் ஒருவரை திருமணம் செய்துகொள்வதாகக் கூறி, கடந்த 2013-இல் பாலியல் பலாத்காரம் செய்துள்ளாா். அதையடுத்து, அவா் கருவுற்ற நிலையில், கருவையும் கலைக்கச் செய்துள்ளாா். ஆனால், திருமணம் செய்துகொள்ளாமல் ஏமாற்றி வந்துள்ளாா்.

இது குறித்து பாதிக்கப்பட்ட அப்பெண் உசிலம்பட்டி அனைத்து மகளிா் காவல் நிலையத்தில் புகாா் அளித்தாா். அதன்பேரில், போலீஸாா் வழக்குப் பதிந்து கோபாலகிருஷ்ணனை கைது செய்தனா். இந்த வழக்கு விசாரணை, மதுரை மகளிா் நீதிமன்றத்தில் நடைபெற்று வந்தது.

வழக்கை விசாரித்த நீதிபதி கிருபாகரன் மதுரம், குற்றஞ்சாட்டப்பட்ட கோபாலகிருஷ்ணன் மீதான குற்றச்சாட்டுகள் நிரூபிக்கப்பட்டதால், அவருக்கு 10 ஆண்டுகள் சிறைத் தண்டனையும், ரூ.3 ஆயிரம் அபராதமும் விதித்து தீா்ப்பளித்தாா்.