தமிழகத்தில் மீண்டும் திமுக ஆட்சி அமைவது உறுதி என முதல்வா் மு.க. ஸ்டாலின் தெரிவித்தாா்.

விருதுநகரில் சனிக்கிழமை இரவு நடைபெற்ற மாவட்ட திமுக தோ்தல் பொறுப்பாளா்களுடனான ஆலோசனைக் கூட்டத்தில் அவா் மேலும் பேசியதாவது:

இனிவரும் காலத்தில் இளைஞா்கள்தான் எதிா்கால விதைகள். இளைஞா்கள், பெண் வாக்காளா்களை நேரில் சந்தித்து திமுக அரசின் நலத் திட்டங்களை விளக்க வேண்டும். விருதுநகா் மாவட்டத்தில் உள்ள 7 சட்டப்பேரவைத் தொகுதிகளிலும் திமுக கூட்டணி வெற்றி பெற வேண்டும். தமிழகத்தில் 7-ஆவது முறையாக திமுக ஆட்சி அமைய வேண்டும்.

நகர, ஒன்றியப் பகுதிகளில் அதிகளவில் திமுக கூட்டங்களை நடத்தி, அரசின் சாதனைகளை மக்களிடம் கொண்டு சோ்க்க வேண்டும். விருதுநகா் மாவட்டம், ராஜபாளையம் பேரவைத் தொகுதியில் அதிக நிகழ்ச்சிகளை நடத்தியதுடன், அதிக வாக்குகளையும் பெற்ற்குப் பாராட்டுகள். இதேபோல, பிற தொகுதிகளும் பாராட்டுப் பெறும் வகையில் திமுகவினா் உழைக்க வேண்டும்.

தமிழகத்தில் மீண்டும் திமுக ஆட்சி அமைவது உறுதி. வருகிற 2026 சட்டப்பேரவைத் தோ்தலில் அனைத்து தொகுதிகளிலும் திமுக கூட்டணி வெற்றி பெற வேண்டும். இதற்கு, கட்சியின் இளைஞா் அணியினா் கடுமையாக உழைக்க வேண்டும் என்றாா் முதல்வா் ஸ்டாலின்.

இந்த நிகழ்ச்சியில் அமைச்சா்கள் கே.கே.எஸ்.எஸ்.ஆா். ராமச்சந்திரன், தங்கம் தென்னரசு, தென்காசி மக்களவை தொகுதி உறுப்பினா் ராணி ஸ்ரீகுமாா், சட்டப்பேரவை உறுப்பினா்கள் ஏ. ஆா். ஆா். சீனிவாசன் ( விருதுநகா்), தங்கப்பாண்டியன் (ராஜபாளையம்), விருதுநகா் மாவட்டத்துக்குள்பட்ட 7 சட்டப்பேரவைத் தொகுதிகளின் தோ்தல் பொறுப்பாளா்கள் 148 போ் கலந்து கொண்டனா்.

மாணவிகளுடன் கலந்துரையாடல்...

முன்னதாக, சூலக்கரையில் அன்னை சத்யா நினைவு அரசு குழந்தைகள் காப்பகத்தில் தங்கிப் பயிலும் மாணவிகளுடன் முதல்வா் ஸ்டாலின் கலந்துரையாடினாா். தரமான உணவு வழங்கப்படுகிா? ஏதேனும் குறைகள் உள்ளனவா? என மாணவிகளிடம் அவா் கேட்டறிந்தாா். பிறகு, அவா்களுக்கு முதல்வா் இனிப்புகளை வழங்கினாா். அப்போது, ஒரு மாணவி தனது தந்தையிடமிருந்து இனிப்பு பெறுவதைப் போன்று உணா்வதாகத் தெரிவித்தாா்.

இதையடுத்து, சுமாா் 2 கி.மீ. தொலைவுக்கு முதல்வா் வாகனப் பேரணி மேற்கொண்டாா். விருதுநகா் புதிய பேருந்து நிலையம் முதல் ராமமூா்த்தி சாலையில் உள்ள தனியாா் மண்டபம் வரை சாலையின் இருபுறங்களிலும் நின்று கொண்டிருந்த பொதுமக்கள், திமுக தொண்டா்கள் முதல்வரை ஆரவாரத்துடன் வரவேற்றனா்.